Qazaqstanda JOO-nyń «Adaldyq lıgasy» quryldy
ASTANA. QazAqparat - Qazaqstanda joǵary bilim máselesin jetildirý maqtasynda «Akademııalyq adaldyq lıgasy» quryldy, dep habarlaıdy QazAqparat tilshisi.
Bul týraly búgin Ortalyq kommýnıkatsııalar qyzmetinde ótken baspasóz máslıhatynda QR BǴM vıtse-mınıstri Ashat Aımaǵambetov málim etti.
«Elimizde «QR keıbir zańnamalyq aktilerine joǵary oqý oryndarynyń akademııalyq jáne basqarý derbestigin keńeıtý máseleleri boıynsha ózgerister men tolyqtyrýlar engizý týraly» Zań qabyldanǵany belgili. Atalǵan zań JOO akademııalyq jáne basqarý erkindigin birtindep keńeıtýge baǵyttalǵan. Osy oraıda, qazaqstandyq JOO ózara birigip adaldyq lıgasyn qurýda. Bul bastamany mınıstrlik tolyǵymen qoldaıdy. Búgin nıet bildirgen JOO oryndary ortaq deklaratsııa qabyldap qol qoıdy», - dedi Ashat Aımaǵambetov.
Lıganyń negizgi maqsaty akademııalyq adaldyq qaǵıdattaryn iske asyrý jáne ilgeriletý arqyly joǵary bilim berý sapasyn arttyrý. Lıganyń qyzmeti álemniń eń úzdik ýnıversıtetteriniń tájirıbelerine negizdelgen 10 qaǵıdattarmen tyǵyz baılanysty.
Ázirge adaldyq lıgasy quramyna erikti túrde Nazarbaev Ýnıversıteti, L.Gýmılev atyndaǵy EUÝ, Ál-Farabı atyndaǵy QazUÝ, M.Nárikbaev atyndaǵy KAZGıÝÝ taǵy basqa 21 joǵary oqý orny kirdi. Lıgaǵa múshe bolýǵa kez kelgen JOO múmkindigi bar, biraq onyń arnaıy qaǵıdalary men talaptary bar.
Joǵarǵy oqý oryndarynyń «Akademııalyq adaldyq lıgasy» qaýymdastyǵynyń tóraǵalyǵyna L. Gýmılev atyndaǵy EUÝ-niń rektory Erlan Sydyqov pen M. Nárikbaev atyndaǵy KAZGıÝÝ ýnıversıtetiniń rektory Talǵat Nárikbaev usynyldy.
