Qazaqstanda jolǵa jaýapty kompanııalardyń reıtıngi jasalmaq

BALQASh. QazAqparat – Endigi ýaqytta elimizde jol salatyn jáne jóndeıtin merdiger kompanııalardyń reıtıngi ázirlenedi. Bul týraly «QazAvtoJol» ulttyq kompanııasynyń basqarma tóraǵasy Ulan Álipov málim etti, dep habarlaıdy QazAqparat tilshisi.

«Biz bıyldan bastap elimiz boıynsha jol salatyn jáne jóndeıtin merdiger kompanııalardyń reıtıngisin jasamaqpyz. Búginde reıtıng júrgizýdiń talap-erejeleri ázirlenip, bekitildi. Sondaı-aq, barlyq merdiger kompanııalar habardar etildi. Endigi ýaqytta jol jóndep jatqan merdiger kompanııanyń jumysyn arnaıy qurylǵan komıssııa qadaǵalap, oǵan baǵa beredi. Reıtıng arnaıy eseptelgen baldyq júıemen júrgiziledi. Eger kompanııa jumysynan aqaý tabylsa, demek baly kemıdi degen sóz», - dedi U. Álipov.

Onyń aıtýynsha, merdiger kompanııalardyń reıtıngi bolashaqta memlekettik satyp alý júıesine engizilmek.

«Óz jumysyn tııanaqty, kemshiliksiz atqarǵan kompanııalar memlekettik satyp alý júıesinde aldyńǵy orynda turady. Jáne olarǵa belgili bir jeńildikterde qarastyrylatyn bolady. Al kerisinshe jumysy aqsaǵan jol jóndeý kompanııalardy qajet jaǵdaıda memlekettik satyp alý protsesine qatystyrmaý sharalarynda qarastyrmaqpyz. Árıne munyń barlyǵyn arnaıy komıssııa sheshedi. Onyń quramynda jol salasy mamandarynan bólek, táýelsiz sarapshylar, monıtorıng mamandary jáne qoǵam belsendileri bolady», - dedi ol.

Buǵan deıin atalǵan kompanııa basshysy «Qaraǵandy - Balqash» tasjolynyń qashan paıdalanýǵa beriletinin habarlaǵan bolatyn.