Qazaqstanda jolaýshylar vagondarynyń 90 paıyzy jańartylmaq
ASTANA. KAZINFORM — Qazaqstanda 2030 jylǵa deıin jolaýshylar vagondarynyń 90 paıyzyn jańartý josparlanyp otyr. Bul týraly «Qazaqstan temir joly» ulttyq kompanııasy basqarma tóraǵasynyń orynbasary Ánýar Ahmetjanov Astana — Almaty baǵytyndaǵy jańa Stadler vagondaryn iske qosý rásiminde aıtty.
— Qazir bizdiń parkte ártúrli vagondar bar. Olardyń arasynda 1993 jyly shyǵarylǵan eski vagondar da kezdesedi. 2030 jylǵa deıin mundaı vagondar qoldanystan alynady. Stadler jáne Petropavl qalasynda shyǵarylǵan vagondar esebinen jolaýshylar vagondary parkiniń 90 paıyzy jańartylady, — dedi Ánýar Ahmetjanov.
Onyń aıtýynsha, vagon parkin jańartý jumystary kezeń-kezeńimen júrgiziledi.
Qazirgi ýaqytta «Jolaýshylar tasymaly» AQ 100-den astam Stadler vagonyn qabyldaǵan. Kelisimshartqa sáıkes, 2030 jyldyń sońyna deıin barlyǵy 557 jolaýshylar vagonyn jetkizý josparlanyp otyr. Olardyń qyzmet etý merzimi 40 jyldy quraıdy.
Eske salaıyq, búgin, 11 qarashada Qazaqstanda shyǵarylǵan Stadler vagondarynan jasaqtalǵan alǵashqy jolaýshylar poıyzy Astana — Almaty baǵytyna jolǵa shyqty. Jańa quram №¾ «Nurly jol — Almaty-2» baǵyty boıynsha kún saıyn qatynaıdy.
