Qazaqstanda jolaýshylar tasymaly 11,9%-ǵa artty — statbıýro

ASTANA. KAZINFORM — Bıylǵy jyldyń qańtar-qazan aılary aralyǵynda Qazaqstanda barlyq kólik túrimen 1 591,3 mln jolaýshy tasymaldanǵan, bul ótken jyldyń sáıkes kezeńimen salystyrǵanda 11,9% artyq. Bul týraly Ulttyq statıstıka bıýrosy málim etti. 

Jolaýshy aınalymy 74,3 mlrd jolaýshy-kılometrdi qurap, 8,3% ósti. Kólik tasymaldarynan túsken tabys 1,2 trln teńge boldy.

— Jolaýshylardyń negizgi bóligi — 98,1% avtomobıl jáne qala ishindegi tasymaldar (avtobýstar, trolleıbýstar, taksı jáne basqa da kólik túrleri) úlesinde. Bıylǵy jyldyń 10 aıynda 1 561,5 mln jolaýshy tasymaldanyp, ótken jylmen salystyrǵanda 12,2% artty. Bul segmentten túsken tabys 406,3 mlrd teńgeni qurady, — delingen habarlamada.

Statıstıka bıýrosynyń málimetinshe, taksı qyzmetin 10 aıda 137,1 mln jolaýshy paıdalanǵan, ótken jylmen salystyrǵanda ósim — 2,4 esege ulǵaıǵan.

Al temirjol kóligi 16,3 mln jolaýshy tasymaldady, bul ótken jylmen salystyrǵanda 6,7% az. Tabys mólsheri 120,3 mlrd teńge boldy.

Áýe kóligi 13 mln jolaýshy tasymaldap, ósim 6,1% qurady. Áýe tasymaldarynan túsken tabys 741,8 mlrd teńge boldy.

Eske sala keteıik, buǵan deıin qazan aıynda Astana men Almaty qalasynda baspana kóp satylǵanyn jazǵan edik.