Alǵash ret jolaýshy mingen ushqyshsyz áýe kóligi kókke kóterildi
ASTANA. KAZINFORM – Astanada EH216-S ushqyshsyz jolaýshylar áýe kóliginiń alǵashqy demonstratsııalyq ushýy sátti ótti. Bul – Qazaqstan tarıhynda jolaýshy mingen ushqyshsyz áýe apparatynyń alǵashqy demonstratsııalyq ushýy, dep habarlaıdy Kólik mınıstrligi.
Tik ushyp-qonyp, elektr qýatymen qozǵalatyn (eVTOL) serııalyq áýe apparaty «Future Games 2026» halyqaralyq týrnıri aıasynda elordadaǵy arnaıy ruqsat etilgen aýmaqta synaq ushýyn oryndady.
Demonstratsııalyq ushý barysynda qatysýshylar ushqyshsyz áýe júıeleriniń naqty jaǵdaıda qoldanylý múmkindikterimen tanysty. EH216-S eki jolaýshyny tasymaldaýǵa arnalǵan. Onyń eń joǵary jyldamdyǵy saǵatyna 130 shaqyrymdy, al ushý qashyqtyǵy 35 shaqyrymǵa deıin jetedi.
«Alǵashqy kezeńde Qazaqstannyń tabıǵı, mádenı jáne tarıhı kórikti jerleri ústimen uzaqtyǵy 5–30 mınýt bolatyn demonstratsııalyq jáne týrıstik baǵyttardy iske qosý josparlanyp otyr», – dep habarlady mınıstrlik.
Vedomstvonyń málimetinshe, bolashaqta mundaı ushqyshsyz jolaýshylar áýe júıeleri qoldanystaǵy kólik túrlerin tolyqtyryp, elimizdiń zamanaýı kólik ınfraqurylymynyń bir bóligine aınalady.
Joba aıasynda ushqyshsyz áýe júıelerin shuǵyl medıtsınalyq kómek kórsetýge, dári-dármek jetkizýge, órt sóndirý jumystaryna, logıstıkaǵa jáne jedel áreket etýdi qajet etetin ózge de salalarda paıdalaný kózdelip otyr.
Sonymen qatar Qazaqstanda jolaýshylarǵa arnalǵan ushqyshsyz áýe júıelerin kezeń-kezeńimen jergilikti jerde óndirý josparlanǵan. Bul joǵary tehnologııaly mashına jasaý salasyn damytýǵa, jańa jumys oryndaryn ashýǵa jáne ónerkásiptik kooperatsııany keńeıtýge múmkindik beredi.
«Qazirgi tańda Kólik mınıstrligi múddeli memlekettik organdarmen birlesip, qalalyq áýe mobıldigin damytý úshin qajetti quqyqtyq jáne ınfraqurylymdyq negizdi qalyptastyrý jumystaryn júrgizýde», – delingen habarlamada.
Aıta keteıik, Almatyda Ushqyshsyz avıatsııany damytý ınnovatsııalyq ortalyǵy ashyldy.
