Qazaqstanda jol jóndeý sapasyn baqylaıtyn 16 mobıldi zerthana jumys istep tur
ASTANA. KAZINFORM – Ulttyq jol aktıvteri sapasy ortalyǵy respýblıkalyq mańyzy bar avtojoldardaǵy jóndeý jumystaryna baqylaýdy mobıldi zerthanalar arqyly kúsheıtip jatyr.
Qazirgi ýaqytta el boıynsha qurylys, rekonstrýktsııa jáne jóndeý nysandarynda 16 jyljymaly zerthana jumys isteıdi. Olar tekserý jumystaryn tikeleı jol ýchaskelerinde júrgizýge múmkindik beredi.
Kezekti tekserý barysynda mobıldi zerthanalardyń biri Mańǵystaý oblysyndaǵy «Fort-Shevchenko – Taýshyq – Shetpe» avtojolynyń 91-161 shaqyrym aralyǵyndaǵy jóndeý ýchaskesine barǵan.
Ulttyq jol aktıvteri sapasy ortalyǵynyń mamandary nysanǵa úsh márte baryp, jol-qurylys materıaldarynan 34 synama alǵan. Barlyq úlgiler zerthanalyq saraptamadan ótkizilgen. Tekserý nátıjesinde materıaldardyń normatıvtik-tehnıkalyq qujattama talaptaryna sáıkes kelmeýiniń úsh deregi jáne tehnologııalyq talaptardyń eki buzýshylyǵy anyqtalǵan.
- Anyqtalǵan kemshilikter boıynsha merdiger uıym men tehnıkalyq qadaǵalaý kompanııasyna olardy joıý jóninde nusqama berildi, - dep jazdy Kólik mınıstrliginen.
Mamandardyń aıtýynsha, mobıldi zerthanalar aqaýlardy erte kezeńde anyqtap, jol sapasyn arttyrýǵa múmkindik beredi.
Kólik mınıstrligi jol ınfraqurylymynyń sapasy men qaýipsizdigin baqylaýdy kúsheıtý baǵytyndaǵy jumystardy jalǵastyryp keledi.
Aıta keteıik, Óskemen – Semeı jolynyń 51 shaqyrymy jańartylyp jatyr.
