Qazaqstanda jol talǵamaıtyn SsangYong kóligi qurastyrylatyn bolady

sp;ASTANA. Jeltoqsannyń 1-i. QazAqparat /Marlan Jıembaı/ - Elimizdiń iri kásiporyndarynyń biri «Agromashholdıng» AQ Allur Auto qazaqstandyq avtomobılder kompanııasy tobymen jáne ońtústik koreılik SsangYong Motors Corporation kompanııasymen birlesip, Qazaqstanda jol talǵamaıtyn SsangYong kóligin qurastyrý jobasynyń bastalǵandyǵyn málim etti,

dep habarlaıdy QazAqparat.

«Qazaqstanda SsangYong kólikterin shyǵarý otandyq tutynýshylar úshin bul avtomobılderdiń baǵasyn 25 paıyzǵa tómendetýge múmkindik beredi», deıdi Allur Auto kompanııalar tobynyń bas dırektory Andreı Lavrentev.

Onyń aıtýynsha, Qostanaıda qurastyrylatyn kólikterdiń sapasy koreılik kólikterden esh aıyrmashylyǵy bolmaıdy. Taıaýda qol qoıylǵan kelisimshartqa sáıkes qurastyrý kesheninde óndiris jáne sapa menedjmenti júıesi qoldanylady. Sonymen qatar kásiporynda jumys isteıtin kóptegen mamandar Koreıadan oqyp kelgen.

Kelesi jyldyń ortasynda alǵashqy ónimin shyǵaratyn kásiporyn bastapqyda 1000 kólik qurastyrady. Jalpy 5 jyldyń ishinde kásiporynnyń jyldyq qýatyn 7500 birlikke jetkizý josparlanyp otyr.

«Kólik shyǵarýǵa kásiporynnyń barlyq jumysshylary qatysady. Sonymen qatar aldaǵy 5 jylda taǵy da qosymsha 300 jańa jumys ornyn ashamyz. Bizdiń oıymyzsha, joǵary tehnologııalyq óndiris orny respýblıkanyń óndiristik qýatyn arttyrýǵa arnalǵan baǵdarlamaǵa óziniń qomaqy úlesin qosatyn bolady», dedi «Agromashholdıng» AQ-nyń prezıdenti Dın Kım.