Qazaqstanda jol sapasyna baqylaý kúsheıedi: Úkimet qandaı ózgerister engizbek
ASTANA. KAZINFORM — Úkimette avtojol salasyn reformalaý máseleleri qaraldy. Jol sapasyn jaqsartý, jóndeý qunyn tómendetý jáne aýyr júk kólikteriniń qozǵalysyn baqylaýdy kúsheıtý boıynsha naqty sheshimder ázirleý tapsyryldy. Bul týraly Úkimettiń baspasóz qyzmeti málim etti.
Qazaqstan Respýblıkasy Premer-mınıstriniń birinshi orynbasary Nurlybek Nálibaevtyń tóraǵalyǵymen avtojol salasyn reformalaý jónindegi jumys tobynyń kezekti otyrysy ótti.
Jıynda «QazAvtoJol» UK» AQ tóraǵasy Darhan Imanashev jumystyń aralyq nátıjeleri týraly baıandama jasady, jol qurylysyn materıaldarmen qamtamasyz etý, salmaqtyq-gabarıttik baqylaýdy jetildirý, tehnıkalyq qadaǵalaýdy kúsheıtý, jol bıtýmynyń sapasyn arttyrý jónindegi usynystary qaraldy.
— Nurlybek Nálibaev sheshimderdi ázirleý kezinde jol salý, jóndeý, paıdalaný boıynsha naqty tájirıbesi bar sala mamandarynyń pikirin eskerý qajettigin, tehnıkalyq máseleler ınjenerlerdiń, tehnologter men salalyq sarapshylardyń tikeleı qatysýymen qaralýy tıis ekendigin atap ótti, — delingen habarlamada.
Premer-mınıstrdiń birinshi orynbasary ruqsat etilgen júkteme normalarynan asyp, jol jabynynyń merziminen buryn buzylýyna ákep soǵatyn aýyr júk kólikteriniń qozǵalysyna jol bermeý qajettigine erekshe nazar aýdardy.
«Jol aktıvteri sapasy» ulttyq ortalyǵynyń qabyldaıtyn sheshimderi men beretin qorytyndylary úshin jaýapkershiligin kúsheıtý qajettigi aıtyldy.
Sondaı-aq jıynda Jetisý, Pavlodar jáne Túrkistan oblystary ákimderi orynbasarlarynyń usynystary da tyńdaldy.
Otyrys qorytyndysy boıynsha Nurlybek Nálibaev Kólik mınıstrligine «QazAvtoJol» UK» AQ, óńir ákimdikteri jáne múddeli taraptarmen birlesip avtomobıl joldarynyń sapasy men uzaq merzimge tózimdiligin arttyrýǵa, jol jumystarynyń qunyn tómendetýge, bıýdjet qarajatyn tıimdi paıdalanýǵa, aýyr júk kólikteriniń qozǵalysyn baqylaýǵa baǵyttalǵan naqty sheshimder ázirleýdi tapsyrdy.
Buǵan deıin Premer-mınıstrdiń birinshi orynbasary Nurlybek Nálibaev jetkizilgen tabıǵı gaz úshin «QazaqGaz Aimaq» AQ aldynda energııa óndirýshi uıymdardyń bereshegin tómendetý máseleleri jóninde keńes ótkizgenin jazdyq.
