Qazaqstanda jol salýdyń standarttaryn ózgertý usynyldy
ASTANA. QazAqparat - Parlament Májisiniń depýtaty Erlan Barlybaev Qazaqstandaǵy qalaaralyq tas joldardy tyń standartpen qaıta salýdy usyndy, dep habarlaıdy «QazAqpart» HAA tilshisi.
«Qazaqstannyń klımattyq erekshelikterin eskere otyryp, avtokólik joldarynyń standarttaryn qaıta qaraýdy usynamyz. Betondy negizdegi joldardyń barlyǵyn tehnologııalyq asfaltty qabatpen japqan durys. Sonymen birge, qaýipti sanalatyn burylystar, ór men eńis joldardy maqsatty túrde rezeńke untaqpen japqan abzal. Rezeńke untaqtaryn ýtılızatsııalyq zaýyttardaǵy eski avtokólikterdiń qaldyqtaryn paıdalanýǵa bolady», - dedi Erlan Barlybaev QR Investıtsııalar jáne damý mınıstri Jeńis Qasymbektiń atyna joldaǵan depýattyq saýalynda.
Barlybaevtyń paıymynsha, atalǵan usynys Qazaqstan Prezıdentiniń bıylǵy Joldaýynda belgilengen «jasyl» tehnologııalardy engizý men qatty qaldyqtardy joıý mindetterimen úndesedi. Depýtat óz sózinde betondy joldar qysta qatyp qalyp, taıǵanaq ári júrýge qaýipti jaǵdaıda bolatynyn aıtady.
«Mundaı joldarmen ásirese kúz jáne qys mezgilderinde júrý betondy jabyndynyń birqatar kemshilikterin anyqtap berdi. Naqtyraq aıtqanda, sýyq túsken kezde mundaı joldar syrǵanaqqa aınalyp shyǵa keledi. Eger Eýropada bul jabyndy aıtarlyqtaı yńǵaıly desek, klımaty shuǵyl-kontınentaldy Qazaqstanda joldardyń osyndaı erekshelikteri kóptegen jol-kólik oqıǵalaryna sebep bolyp jatady», - deıdi ol.
Depýtat sonymen qatar, joldyń taıǵanaq kúıge aınalýy sebepti Astana - Şýchınsk, Astana - Qaraǵandy, Almaty - Qapshaǵaı sekildi jańa joldardyń ózinde kóptegen jol apattary tirkeletinin atap ótti.
«Kókshetaý- Kishkenekól jáne Almaty oblysy Raıymbek aýdanyndaǵy Jalańash- Kólsaı jolynda rezeńke untaqtary qosylǵan asfalty synalyp jatqany belgili. Osy tehnologııany budan da joǵary dárejede engizip, halyqaralyq jáne respýblıkalyq tas joldarda atalǵan standartty bekitý durys dep oılaımyz», - dedi depýtat.
