Qazaqstanda jol-patrýl qyzmetkerleriniń aılyǵy 50 paıyzǵa ósýi múmkin
ASTANA. QazAqparat - Qazaqstanda jol-patrýl qyzmeti polıtseıleriniń aılyǵy 50 paıyzǵa ósýi yqtımal. Jol polıtsııasynyń aılyǵyn kóterý týraly búgin OKQ-da ótken baspasóz máslıhatynda Іshki ister mınıstri Qalmuhanbet Qasymov aıtyp berdi, dep habarlaıdy QazAqparat tilshisi.
«Biz jobalyq keńsemen birlese otyryp, bizdiń polıtsııa qyzmetkerleriniń jumys ýaqytyn qalaısha tıimdi paıdalaný, artyq esep berýlerden aryltý, artyq otyrystar men ózine tán emes qyzmetterden bosatý jumystaryn qarastyrdyq. Qazir boljam jasap otyrsaq, polıtsııa qyzmetkerleriniń 10 paıyzyn qysqarta alady ekenbiz. Odan únemdelgen qarajatty qalǵan polıtsııa qyzmetkerleriniń aılyǵyn kóterýge jumsasaq deımiz. Bizdiń bul turǵyda naqty kózdep otyrǵanymyz bar: halyqpen tikeleı jumys atqaratyn jol-patrýldik polıtsııa qyzmetkerleriniń aılyǵyn 50 paıyzǵa kótersek deımiz. Attestattaýdan kim ótedi - sol qalady, ótpeıtini - jumystan bosatylady. Bul birinshi baǵyt», - dedi Qalmuhanbet Qasymov.
QR Іshki ister mınıstrligi ekinshiden polıtsııa qyzmetkerlerin jumysqa ornalastyrý merzimin qysqartpaq.
«Qazirgi tańda bizdiń qyzmetkerlerdi jumysqa alý ýaqyty 9-10 aıǵa sozylyp ketedi. Biz osy merzimdi qysqartqymyz keledi, sebebi bul jerde jemqorlyqqa baılanysty da suraqtar týyndaıdy. Olar medkomıssııadan aýdannan, oblystan ótip, bizdiń oqý oryndaryna kelgen kezde úmitkerdiń qyzmetke múlde saı emestigin kóresiń. Al ol bolsa barlyq jerden súrinbeı ótip ketken. Mine, sondyqtan, osy máselelerdi jiti zerttep, oqýǵa qabyldaý ýaqytyn 9 aıdan 5-6 aıǵa deıin qysqartyp, synaq merzimin engizsek deımiz», - dedi mınıstr.
