Qazaqstanda jol qurylysyna arnalǵan tsementterdiń sapasy zerttelip jatyr
ASTANA. KAZINFORM – Qazaqstanda avtomobıl joldaryn salý men jóndeýde paıdalanylatyn otandyq tsementterdiń sapasyn keshendi baǵalaý jumystary bastaldy.
«QazjolǴZI» AQ mamandary júzege asyryp jatqan ǵylymı joba qazaqstandyq óndiristegi tsementterdiń hımııalyq quramy men fızıka-mehanıkalyq qasıetterin taldaýǵa baǵyttalǵan.
Zertteýdiń maqsaty – otandyq tsementterdiń sapasyn baǵalap, Qazaqstannyń klımattyq jaǵdaılaryn eskere otyryp jol qurylysyna arnalǵan tsementterge qoıylatyn ǵylymı negizdelgen talaptardy ázirleý.
– Jol qurylysynda tsement negizgi materıaldardyń biri bolyp tabylady. Onyń sapasyna jol jamylǵysynyń beriktigi, aıazǵa tózimdiligi, temperatýralyq ózgeristerge turaqtylyǵy jáne avtomobıl jolynyń qyzmet etý merzimi tikeleı baılanysty. Sondyqtan tsement qasıetterin zertteý eldiń kólik ınfraqurylymynyń senimdiligin arttyrýda strategııalyq mańyzǵa ıe, – dep atap ótti «QazjolǴZI» mamandary.
Qazirgi ýaqytta «QazAvtoJol» ulttyq kompanııasy, Jol aktıvteri sapasynyń ulttyq ortalyǵy jáne tsement óndirýshi kásiporyndar ókilderiniń qatysýymen synamalar iriktelip jatyr.
Búginde Qazaqstanda qurylys salasyna ónim shyǵaratyn 11 tsement zaýyty jumys isteıdi. Osy ýaqytqa deıin Mańǵystaý, Qyzylorda jáne Túrkistan oblystaryndaǵy, sondaı-aq Shymkent qalasyndaǵy kásiporyndardan tsement úlgileri alynǵan.
Zertteý barysynda mamandar tsementterdiń fızıka-mehanıkalyq qasıetterin, hımııalyq quramyn jáne mıneraldyq qospalardyń áserin taldaıdy. Sonymen qatar otandyq zaýyttardyń óndiristik múmkindikteri men ónim túrleri boıynsha derekter jınaqtalady.
– Ǵylymı jumystyń negizgi nátıjeleriniń biri retinde «Jol qurylysyna arnalǵan tsement» normatıvtik-tehnıkalyq qujat jobasy ázirlenedi. Bul qujat tsementbeton joldaryn salýda qoldanylatyn tsementterge biryńǵaı talaptar belgileýge múmkindik beredi, – delingen habarlamada.
Mamandardyń pikirinshe, zertteý nátıjeleri jol-qurylys materıaldarynyń sapasyn arttyrýǵa, tsementbeton jabyndarynyń uzaqmerzimdiligin qamtamasyz etýge jáne zamanaýı tehnologııalardy keńinen engizýge negiz bolady.
