Qazaqstanda jol qurylysyna arnalǵan 52 jańa tehnologııa «jasyl» mártebe aldy
ASTANA. KAZINFORM — Qazaqstanda jol qurylysyna arnalǵan 52 jańa materıal men tehnologııa resmı túrde synaqtan ótip, qoldanýǵa ruqsat etildi, dep habarlaıdy Kólik mınıstrligi.
Olar rcmbase.qazjolgzi.kz bazasynda «jasyl» mártebege ıe boldy, bul olardyń tıimdiligi dáleldengenin bildiredi.
Qazirgi ýaqytta bazada 188 sheshim tirkelgen:
- 52-si — «jasyl» (qoldanýǵa usynylǵan),
- 29-y — «sary» (synaqta),
- 101-i — «sur» (tek zerthanalyq synaqtan ótken),
- 6-ýy — «kók» (Tehnıkalyq keńestiń sheshimin kútýde).
— 2025 jyly joldarda 13 ınnovatsııa synaqtan ótti. Olardyń qatarynda geotekstıl, germetıkter, polımerlik qospalar men kóktaıǵaqqa qarsy reagentter bar. Jyl sońyna deıin taǵy shamamen 80 jańa tehnologııa aprobatsııadan ótpek, — delingen habarlamada.
«Jasyl» mártebe alǵan sheshimderdiń ishinde:
• Almaty — Qorǵas trassasy men Astanadaǵy M3 kópirinde qoldanylǵan lenta men suıyq rezeńke;
• Katonqaraǵaı áýejaıynda jáne Pavlodardaǵy ushý-qoný jolaǵynda tıimdiligin dáleldegen germetıkter;
• Túrkistan oblysynda asfaltty nyǵaıtyp, jol jamylǵysynyń qyzmet merzimin uzartyp otyrǵan sińdirgish qospalar.
Sonymen qatar otandyq ǵalymdardyń tehnologııalary engizilip jatyr: «Mamlıýtka — Qostanaı» ýchaskesinde topyraqty turaqtandyrǵyshtar, al «Jetibaı — Shetpe» jolynda asfaltbeton qospasyn jaqsartatyn modıfıkatorlar qoldanyldy.
Olar jabyndynyń temperatýralyq aýytqýlarǵa tózimdiligin arttyryp, jolda oıyqtar men deformatsııalardyń paıda bolýyn tejeıdi.
Ashyq tsıfrlyq baza rcmbase.qazjolgzi.kz aqparattyń barlyǵyn qoljetimdi etip, jol salasyna ozyq tájirıbelerdi engizýge múmkindik beredi.
Budan buryn Kólik mınıstrligi «Aeroflot» áýe kompanııasyna qatysty jaǵdaıdy túsindirdi.