Qazaqstanda jol qozǵalysy qaýipsizdigin qamtamasyz etý baǵdarlamasy ázirlenedi
ASTANA. QazAqparat - Qazaqstanda jol qozǵalysy qaýipsizdigin qamtamasyz etý baǵdarlamasy ázirlenedi. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte QR Investıtsııalar jáne damý mınıstrligi Tehnıkalyq retteý jáne metrologııa komıtetiniń tóraǵasy Birjan Qaneshev aıtty.
«Biz ótken jyly jol qozǵalysy qaýipsizdigi ahýalyna saraptama jasadyq. Keshe mınıstrlik basshylyǵy BUU jol qaýipsizdigin qamtamasyz etý jónindegi arnaýly ókili Todt myrzamen birge sheshim kútip turǵan máselelerdiń bar ekendigin Úkimetke baıan etti. Ony sheshý bizde oryn alyp otyrǵan ahýaldy aıtarlyqtaı ózgertedi. Bizge jyl sońyna deıin salalyq baǵdarlama jasaý tapsyrmasy berildi. Oǵan Ulttyq ekonomıka mınıstrliginiń quzyryna jatatyn jol qurylysy protsessinen bastap birneshe mınıstrliktiń jaýapkershiligine kiretin barlyq komponentter kiredi. Іshki ister mınıstrligi jol protsessin úılestirýdi qamtamasyz etedi jáne sáıkesinshe qurylys jáne jol qozǵalysyn uıymdastyrý bizdiń mınıstrlikke qaraıdy», - dedi komıtet basshysy.
B.Qaneshevtiń aıtýynsha, ádister men talaptar, normatıvtik bazalar ózgeriske ushyraıdy. Bul rette BUU tarapynan jol qozǵalysy qaýipsizdigi salasyndaǵy normatıvterdi, standarttar men talaptardy jetildirýge aıtarlyqtaı kómek kórsetýge baǵyttalady.
Aıta keterligi, brıfıngke BUU jol qaýipsizdigin qamtamasyz etý jónindegi arnaýly ýákil Jan Todt, Eýropalyq ekonomıkalyq komıssııanyń ishki kólik komıtetiniń ókili Edýardo Djanottı, QR Avtomotosport federatsııasynyń prezıdenti Marat Ábiqaev qatysty.
