Qazaqstanda jol qozǵalysy qaýipsizdigin baǵalaıtyn ulttyq baǵdarlama iske qosyldy

ASTANA. KAZINFORM — Kólik vıtse-mınıstri Satjan Ablalıev Kavkaz jáne Ortalyq Azııa qurylys forýmynyń ashylýynda Qazaqstan joldaryn baǵalaý baǵdarlamasy — KazRAP-tyń iske qosylǵanyn málimdedi. Bul týraly QR Kólik mınıstrligi málim etti.  

Bul bastama jol qozǵalysy qaýipsizdigin qamtamasyz etý men avtojoldardyń jaǵdaıyn jaqsartýǵa baǵyttalǵan júıeli tásildi kózdeıdi.

KazRAP — jol ınfraqurylymynyń qaýipsizdigin arttyrý boıynsha ulttyq júıeniń negizgi elementine aınalady. Baǵdarlama joldardyń jaı-kúıin halyqaralyq ádistemege súıene táýelsiz baǵalaýdy, jol-kólik oqıǵalaryn aldyn-alýǵa, ınvestıtsııalardyń tıimdiligine monıtorıng júrgizýdi jáne jol qaýipsizdigi salasyndaǵy strategııalyq josparlaýdy kózdeıdi.

Baǵdarlama Halyqaralyq joldardy baǵalaý baǵdarlamasymen (iRAP) birlese júzege asyrylady.

Kelisimge KAZNIIBDD dırektory Arystan Masanov pen iRAP-tyń atqarýshy bas dırektory Greg Smıt qol qoıdy.

Sonymen qatar, Forýmnyń ashylýynda Vıtse-mınıstr vedomstvonyń qazirgi jáne josparlanyp otyrǵan bastamalaryna da toqtalyp, halyqaralyq kólik dálizderin damytýǵa, jol ınfraqurylymyn jańǵyrtýǵa, tsıfrlyq tehnologııalardy engizýge jáne salanyń ınvestıtsııalyq tartymdylyǵyn arttyrýǵa basa mán beriletinin atap ótti.

Forýmǵa memlekettik organdardyń, jeke sektordyń, ınjenerlik qaýymdastyq pen zań salasynyń ókilderinen turatyn 20 elden 120 qatysýshy jınaldy.

Eki kún ishinde 9 taqyryptyq paneldik sessııa ótti. Olar iri ınfraqurylymdyq jobalardy iske asyrý, halyqaralyq qarjy ınstıtýttarynyń qatysýy, jol qaýipsizdigi ınjenerııasy, FIDIC standarttary boıynsha kelisimsharttardy daıyndaý, daýlardy sheshý keńesteriniń qyzmeti, halyqaralyq arbıtraj jáne qurylys salasyndaǵy kásibı áleýetti damytý máselelerin qamtıdy.

Eske sala keteıik, buǵan deıin Senatta jol qaýipsizdigi máselesi talqylandy.