Qazaqstanda jol-kólik oqıǵalarynyń sany 8,9% kóbeıgen

ASTANA. QazAqparat - Statıstıkaǵa sáıkes, elimizde 2022 jyldyń 9 aıynda 10,2 myńǵa jýyq apat oryn aldy, sonyń saldarynan 15 myńnan astam adam zardap shekti. Bul týraly QazAqparat Bas prokýratýrasynyń Quqyqtyq statıstıka jáne arnaıy esepke alý jónindegi komıtetine silteme jasap habarlaıdy.

Ótken jyldyń sáıkes kezeńimen salystyrǵanda jol-kólik oqıǵalarynyń kóbeıýi 8,9%-dy qurady.

Jol apattarynyń saldarynan 1,7 myń adam qaza tapty (21 %-ǵa ósti), onyń ishinde 181-i kámeletke tolmaǵan balalar, 457-i áıelder jáne 1 258-i er adamdar.

Zardap shekkender arasyndaǵy kámeletke tolmaǵandardyń úlesi 19,9%-dy (3 007) quraıdy jáne olar negizinen avtokólik quraldarynyń soqtyǵysýynan zardap shekti.

Sonymen qatar, qoǵamdyq kólikke qatysty 532jol apaty oryn aldy, onda 70 adam qaza tapty jáne 783 adam jaralandy (ótken jyly 446 birliktiń qatysýymen – 436 JKO, onda 61 adam qaza tapty jáne 590 adam jaralandy).

Taldaý kórsetkendeı, jol-kólik oqıǵalarynyń 86,6%-dan astamy júrgizýshilerdiń kinásinen boldy (8 886, 2021 jyly – 7 726), onyń ishinde 363-i (414) alkogoldik nemese esirtkilik mas kúıde bolǵan.

Jol apatynan zardap shekkenderdiń ishinde 2 947 adam 30-39 jas aralyǵynda jáne 2 953 adam 21-29 jas aralyǵyndaǵy jastar bolǵan.

Sondaı-aq kinálilerdiń arasynda da kóbinese 30-39 jas aralyǵyndaǵylar tirkelgen - 2 616 adam, 21-29 jas aralyǵyndaǵy jastar – 2 395 jáne 60 –tan joǵary jastaǵy qarttar – 670 adamdy qurady.

Jol apattarynyń basym bóligi nemese 7 471 (6 375) eldi mekenderde jasalǵan, 1 918 (1 702) halyqaralyq, respýblıkalyq mańyzy bar trassalarda, 869 (870) oblystyq, aýdandyq mańyzy bar joldarda tirkelgen.

Apta kúnderi boıynsha jol apattarynyń eń kóp sany dúısenbi – 1 567, senbi – 1 538 jáne seısenbi – 1 493 kúnderinde jasalǵan. Kóbinese olar kúndizgi ýaqytta – 6 253, túnde – 1 157 jáne kún batqannan keıingi mezgilde 1 662 oryn alǵan.

Jol oqıǵalarynyń kópshiligi qurǵaq jolda – 7 864, dymqyl – 674, qarly – 309, muzdy – 115 jolda jasalǵan.

Burynǵydaı apattardyń eń kóp sany Almaty qalasynyń joldarynda oryn alady – 2 620 jaǵdaı, al eń joǵary ólim kórsetkishi Almaty oblysynda anyqtaldy, onda 327 adam qaıtys boldy. Elordada 495 JKO tirkeldi.​

Apattardyń eń az sany Soltústik Qazaqstan oblysynda - 221 jáne Shymkent qalasy - 217 tirkelgen.

Elimizdiń joldaryndaryndaǵy apattar týraly tolyq aqparatty «qamqor.gov.kz» Quqyqtyq statıstıka jáne arnaıy esepke alý jónindegi komıtetiniń portaly «Geografııalyq kartalar» bóliminiń «JKO» qosymshasynan kórýge bolatynyn eske salamyz.