Qazaqstanda jol erejesin jıi buzatyndarǵa baldyq júıe engizilýi múmkin
ASTANA. KAZINFORM – Qazaqstanda jol erejesin júıeli túrde buzatyn júrgizýshilerge salynatyn aıyppulǵa qosa baldyq júıe engizý usynylyp otyr. Іshki ister mınıstrligi tıisti túzetýlerdi jyl sońyna deıin Quryltaı qaraýyna engizýdi josparlap otyr. Bul týraly Úkimettegi brıfıngte Іshki ister mınıstriniń orynbasary Igor Lepeha aıtty.
Onyń aıtýynsha, mundaı bastama aıyppulǵa mán bermeıtin júrgizýshilerge baılanysty týyndaǵan. Keıbir azamattar jylyna 50-100 aıyppul tólese de, jol erejesin buzýdy qoımaıdy.
– Mundaı adamdarǵa qarjylyq sharalar áser etpeıdi. Sondyqtan osyndaı usynys paıda boldy. Biz keńestik kezeńdegi tájirıbeni eske aldyq. Ol kezde júrgizýshi kýáliginde arnaıy belgi qoıylatyn. Ákelerimiz ben atalarymyz mundaı belgiden qatty qorqatyn. ıAǵnı júrgizýshi erejeni bir ret buzsa, kýáligine belgi qoıylady, ekinshi ret te solaı. Sodan keıin ata-analarymyz jol erejesin buzýdan qatty saqtanatyn, – dedi Igor Lepeha.
Aldyn ala usynys boıynsha júrgizýshige bir jyl ishinde 20 ball jınaý shegi belgilenýi múmkin. Ball sany jasalǵan quqyqbuzýshylyqtyń aýyrlyǵyna qaraı esepteledi. Mysaly, jyldamdyqty saǵatyna 10 shaqyrymǵa arttyrǵany úshin bir ball, al baǵdarshamnyń tyıym salynǵan sıgnalyna ótken jaǵdaıda úsh ball eseptelýi múmkin.
Alaıda vıtse-mınıstr bul kórsetkishterdiń ázirge túpkilikti bekitilmegenin atap ótti.
–Mundaı kórsetkishke jol erejesin júıeli túrde buzatyn, ıaǵnı júrgizýshilerdiń shamamen 1 paıyzy jetedi. Ondaı jaǵdaıda júrgizýshi kýáliginen aıyrylady, – dep túsindirdi ol.
Júrgizýshi kýáliginen aıyrý merzimi de ázirge talqylanyp jatyr. Qarastyrylyp jatqan nusqalardyń biri – alty aı nemese bir jylǵa júrgizý quqyǵynan aıyrý. Odan keıin júrgizýshi jol qozǵalysy erejelerin bilý deńgeıin anyqtaıtyn emtıhandy qaıta tapsyrýy kerek bolady.
QR ІІM Bas prokýratýramen birlesip, baldyq júıeniń is júzinde qalaı jumys isteıtinin de teksergen. Pılottyq jobada mamandar júrgizýshiler jasaǵan quqyqbuzýshylyqtar úshin qansha ball jınaýy múmkin ekenin eseptep kórgen. Bul rette naqty ball eseptelip, eshkimge jaza qoldanylmaǵan.
– Pılottyq júıe aıasynda eshkimdi jazalaǵan joqpyz. Zań qabyldanbaıynsha, mundaı sharany qoldaný zańsyz bolady, – dedi Igor Lepeha.
Eger baldyq júıe zań júzinde bekitilse, Іshki ister mınıstrligi árbir quqyqbuzýshylyq úshin qansha ball esepteletinin anyqtaıdy.
– Menińshe, bul máseleni depýtattyq bastama tártibimen kóteremiz. Eger depýtattardyń biri bizdi qoldasa, bul máseleni qýana usynamyz. Bul baǵyttaǵy jumystardy kóktemde bastap qoıǵanbyz. Endi osy jyly máseleni Quryltaıdyń qaraýyna engizemiz dep oılaımyn, – dedi ІІM basshysynyń orynbasary.
Aıta keteıik, Qazaqstanda jańa Stadler vagondaryn qazan aıynyń sońy men qarasha aıynyń basynda júre bastaıdy.
Qazaqstan polıtsııasyna 20 myńnan astam qyzmetker jetispeıdi.
Buǵan deıin Igor Lepeha Astanada týrıstik polıtsııada qyzmet etken eki qyzmetkerdiń jumystan bosatylýy jóninde túsinikteme berdi.
