Qazaqstanda jol apaty jıi oryn alatyn óńirler belgili boldy
ASTANA. QazAqparat - QR Bas prokýratýrasynyń Quqyqtyq statıstıka jáne arnaıy esepke alý komıteti 2017 jyldyń birinshi jartyjyldyǵynda adamdar zardap shekken jol-kólik oqıǵalarynyń qaı óńirde kóp tirkelgenin jarııa etti, dep habarlaıdy QazAqparat.
Komıtet málimetinshe, jyldyń 6 aıynda elimizdiń joldarynda 7 127 jol-kólik oqıǵasy oryn alyp, onda 9 992 adam zardap shekse, 738-i qaza tapqan. Ótken jyldyń sáıkes kezeńimen salystyrǵanda jol apaty - 10,7, zardap shekkenderdiń sany - 10,3, qaza tapqandardyń sany - 20,5 protsentke tómendeýi baıqalady.
Eń kóp jol apaty Almaty qalasy, Almaty jáne Ońtústik Qazaqstan oblystarynda oryn alǵan. Adam ólimi boıynsha Almaty oblysy alda tur. Bul óńirde 162 adam jol apatynda qaza tapqan. Birinshi jartyjyldyqtaǵy eń úlken jol-kólik oqıǵasy Aqtóbe oblysynda tirkeldi. Jol apaty kezinde 16 adam zardap shekti, onyń 9-y qaza tapty.
Almaty qalasyndaǵy Jandosov pen Manas kósheleriniń qıylysy Qazaqstan boıynsha jol apaty eń jıi oryn alatyn jer retinde tirkelgen. Dál osy kóshelerdiń qıylysynda jyl basynan beri 9 jol apaty bolyp, 10 adam zardap shekken.
