Qazaqstanda jol apaty 5 paıyzǵa azaıdy
ASTANA. QazAqparat - Aǵymdaǵy jyly elimizde jol-kólik apaty sany 5 paıyzǵa tómendedi. Bul týraly búgin QR Parlamenti Senatynda ótip jatqan «Jol qozǵalysy salasyndaǵy quqyqtyq retteýdiń jaı-kúıi men problemalary» taqyrybyndaǵy parlamenttik tyńdaý barysynda elimizdiń Іshki ister mınıstri Qalmuhanbet Qasymov málim etti.
Bizdiń elimizde jol apatynyń shyrqaý shegi 2007 jyly tirkelgen. Sol kezde Dúnıejúzilik densaýlyq saqtaý uıymynyń málimetterine sáıkes Qazaqstanda 1000 myń adamǵa shaqqanda 28 adam qaza taýyp, eýropalyq óńirdegi eń joǵary kórsetkish tirkelgen. Tek sol jyldyń ishinde ǵana Qazaqstanda 4365 adam qaza tapty. Degenmen, 2013 jyldan bastap apattyń barlyq negizgi kórsetkishteri qysqarýynyń turaqty tendentsııasy baıqalady. Máselen, 2013 jyldyń qorytyndysy boıynsha jol-kólik oqıǵalary sanynyń ósimi 65 paıyzǵa, jaraqattanǵandar sany 71 paıyzǵa artsa, al 2014 jyly jol-kólik apaty sanynyń 13 paıyzǵa, qaza tapqandardyń sany 15, jaraqattanǵandardyń sany 13 paıyzǵa kemidi. 2015 jyly jol-kólik apaty 7, qaza tapqandar 5, jaraqat alǵandar 7 paıyzǵa azaıdy. Dál osyndaı jaıt aǵymdaǵy jyly da baıqalyp otyr. Jol-kólik apaty 5 paıyzǵa, qaza tapqandar sany 4 paıyzǵa tómendedi», - dedi mınıstr.
Onyń aıtýynsha, júrgizilgen saraptama joldardaǵy apattar deńgeıiniń turaqtanýyna keshendi sharalardyń oryndalýy, onyń ishinde zańnamalyq sharalardyń qolǵa alynýy óz septigin tıgizgen.
«Birinshiden, halyqaralyq normalalardy eskere otyryp, 2014 jyly «Jol qozǵalysy týraly» Zań ázirlenip, qabyldandy. Onda jol qozǵalysy salasyna tartylǵan sýbektilerdiń jaýapkershilik aımaǵy bekitilgen. Táýekelderdi basqarý júıesi engizildi, kólik quraldaryna talaptar bekitildi jáne olardy paıdalanýddaǵy nenizgi shekteýler naqtylandy. Zańǵa sáıkes Jol qozǵalysy erejesi ázirlendi. Ákimshilik kodekste jol-kólik oqıǵasynyń negizgi sebebi sanalatyn quqyq buzýshylyqtarǵa jaýapkershilik kúsheıtildi», - dedi Qasymov.
