Qazaqstanda jol apatynan bolatyn ólim-jitim 7,8%-ǵa tómendedi
ASTANA. KAZINFORM – Qazaqstanda jol-kólik oqıǵalary sany artqanyna qaramastan, jaraqattar men jol apattarynan bolatyn ólim kórsetkishteri tómendep keledi.
Bul týraly akademık N.D. Batpenov atyndaǵy Ulttyq ǵylymı travmatologııa jáne ortopedııa ortalyǵynyń dırektory Oljas Bekarysov Densaýlyq saqtaý mınıstrligine 2025 jyldyń qorytyndysy men 2026 jyldyń birinshi toqsany boıynsha esep berý kezinde aıtty.
Ortalyq málimetinshe, 2025 jyly Qazaqstanda jazataıym oqıǵalardan, ýlanýlar men jaraqattardan bolatyn ólim kórsetkishi 8,5%-ǵa tómendegen.
Al jol-kólik oqıǵalarynan bolatyn ólim-jitim 7,8%-ǵa azaıǵan.
Sonymen qatar elde jol apattarynyń sany ósip keledi. Ótken jyly Qazaqstanda 36 myńnan astam jol-kólik oqıǵasy tirkelgen.
Vedomstvo málimetinshe, negizgi baǵyttardyń biri – jaraqattanýdyń aldyn alý. Qazir memlekettik organdarmen birlesip 2026-2030 jyldarǵa arnalǵan jol-kólik oqıǵalary saldaryn tómendetý jónindegi vedomstvoaralyq jospar júzege asyrylyp jatyr.
Osy jumystar aıasynda jol apattary jıi bolatyn qaýipti ýchaskelerdiń tsıfrlyq kartasy ázirlenýde.
Sondaı-aq Qazaqstanda óńirlik travmatologııalyq qyzmet kúsheıtilip jatyr.
Elde óńirlik travmatologııalyq ortalyqtar qurý jalǵasýda. Pılottyq jobalar Astana, Almaty jáne Balqash qalalarynda iske asyrylyp jatyr.
Budan bólek, óńirlerde jańa beıindi bólimsheler men travmpýnktter ashylýda.
Akademık N.D. Batpenov atyndaǵy Ulttyq ǵylymı travmatologııa jáne ortopedııa ortalyǵy búginde Ortalyq Azııadaǵy eń iri joǵary tehnologııalyq ortopedııalyq ortalyqtardyń birine aınalǵan. 2025 jyly munda 10,7 myńnan astam operatsııa jasalǵan.
- Olardyń qatarynda robottandyrylǵan endoprotezdeý, neıronavıgatsııa qoldanylatyn operatsııalar, 3D-ımplanttar men jasýshalyq tehnologııalardy paıdalaný arqyly jasalǵan kúrdeli otalar bar.
Ortalyq medıtsınalyq týrızmdi damytýǵa da basymdyq berip otyr, - dedi dáriger.
Mamandardyń aıtýynsha, Qazaqstandaǵy ortopedııalyq operatsııalardyń quny sheteldik klınıkalarmen salystyrǵanda birneshe ese arzan, al emdeý sapasy halyqaralyq standarttarǵa saı keledi.
2025 jyly ortalyq medıtsınalyq týrızmdi damytýǵa arnalǵan halyqaralyq forým ótkizip, oǵan 13 elden delegattar qatysqan.
Sonymen qatar qazaqstandyq dárigerler Ózbekstan tarıhynda alǵash ret MAKO júıesi arqyly robottandyrylǵan operatsııa jasaǵan.
Qazir Astanada ortalyqtyń jańa zamanaýı korpýsyn salý jumystary jalǵasyp jatyr.
Aıta keteıik, ІІM byltyr jol-kólik oqıǵalarynan bolatyn ólim-jitim 9,7%-ǵa tómendegenin málimdedi.
