Qazaqstanda joǵary voltty jabdyqtar synaqtan ótedi

NUR-SULTAN. QazAqparat – Elimizde zerthanalyq baza men sáıkestikti baǵalaý júıesin damytýǵa erekshe ekpin qoıylmaq. Bul týraly QR Saýda jáne ıntegratsııa mınıstri Baqyt Sultanov aıtty, dep habarlaıdy QazAqparat tilshisi.

«Zerthanalyq baza men sáıkestikti baǵalaý júıesin damytýǵa erekshe ekpin qoıyp otyrmyz. Mysaly, Kentaý transformator zaýyty bazasynda joǵary voltty jabdyqtar boıynsha synaq zerthanasy qurylýda. Zerthanalyq synaq nátıjeleri men sapa sáıkestigi sertıfıkaty barlyq EAEO elderinde moıyndalatyn bolady», - dedi mınıstr Úkimet úıinde ótken baspasóz máslıhatynda.

Sonymen qatar, ol qazaqstandyq naryqta sapasyz ımporttyq taýarlardy saýdalaýǵa qarsy kúres boıynsha ózge de sharalarǵa toqtaldy.

«Qazirgi kezde tańbalaý boıynsha qanatqaqty jobalar temeki jáne alkogoldik ónimderge, aıaq kıim men dárilik preparattarǵa qatysty iske qosyldy. Osy tańbalaý tetigin engizý Qazaqstan ekonomıkasyna ońtaıly nátıje beredi dep oılaımyz», - dedi Baqyt Sultanov.

Budan buryn habarlanǵandaı, mınıstr kásipkerlerdi «ımporttyq qoqysqa» tosqaýyl qoıýǵa shaqyrdy.