Qazaqstanda joǵary tehnologııanyń kómegimen ota jasaý 3 ese artqan

NUR-SULTAN. QazAqparat – Elimizde MÁMS júıesi engizilgennen keıin joǵary tehnologııalyq medıtsınalyq qyzmet 62 paıyzǵa artqan. Bul týraly QR Densaýlyq saqtaý mınıstri Ajar Ǵınııat málim etti, dep habarlaıdy QazAqparat tilshisi.

«MÁMS (mindetti áleýmettik medıtsınalyq saqtandyrý) júıesi 2020 jyldyń 1 qańtarynan bastap iske qosyldy. Júıeni engize bastaǵan kezde pandemııa bastalyp ketti. Osyǵan oraı MÁMS qyzmetine qatysty ózgerister engizildi. Sondyqtan osyǵan deıin MÁMS júıesi tolyq kólemde júzege aspady. Soǵan qaramastan MÁMS-ti engizý densaýlyq salasyna qosymsha qarjy kózin tartyp, qarjylandyrýdyń 80 paıyzǵa deıin artýyna septigin tıgizdi. Qarjylandyrýdy arttyrý medıtsınanyń barlyq salasyna qatysty. ıAǵnı, buryn-sońǵy mán berilmegen salaǵa qarjy bóline bastady», - dedi Ajar Ǵınııat elordada ótken mindetti áleýmettik medıtsınalyq saqtandyrý máselelerine arnalǵan dóńgelek ústel barysynda.

Sondaı-aq, mınıstrdiń málimdeýinshe, MÁMS júıesi medıtsınalyq qyzmettiń qoljetimdi bolýy men onyń aıasyn keńeıtýge múmkindik berdi.

«Profılaktıkalyq tekserý men medıtsınalyq ońaltý 2 esege ósti. Konsýltatsııalyq-dıagnostıkalyq qyzmet 7,7 paıyzǵa artyp otyr. Sonymen qatar statsıonarlyq kómek 54 jáne joǵary tehnologııalyq medıtsınalyq qyzmet 62 paıyzǵa artqan. Odan bólek MÁMS-tiń arqasynda ambýlatorlyq qyzmet pen josparly ota jasaý ýaqyty qysqardy. 2019 jyldan bastap joǵary tehnologııanyń kómegimen jasalatyn ota kólemi 3 ese artqan», - deıdi ol.

Buǵan deıin vedomstvo basshysy elimizde adam óliminiń 5 paıyzǵa deıin azaıǵanyn aıtqan edi.

Aıta keteıik, elordada mindetti áleýmettik medıtsınalyq saqtandyrý júıesi qyzmetine arnalǵan dóńgelek ústel ótip jatyr.