Qazaqstanda joǵary synyptardyń jáne ýnıversıtetterdiń oqý baǵdarlamalary aǵylshyn tilinde oqytylatyn bolady
ASTANA. QazAqparat - Qazaqstanda joǵary synyptardyń jáne ýnıversıtetterdiń oqý baǵdarlamalary aǵylshyn tilinde oqytylatyn bolady. Bul týraly Úkimettiń «Mınıstrge suraq qoı» atty onlaın-konferentsııalar serııasynda QR Bilim jáne ǵylym mınıstri Aslan Sárinjipov málim etti.
«Memleket basshysy Qazaqstanda joǵary synyptardyń jáne JOO-lardyń oqý baǵdarlamalary aǵylshyn tilinde oqytýdy kezeń-kezeńmen kóshirýdi tapsyrdy. Basty maqsat - daıyndap jatqan mamandarymyzdyń básekege qabilettiligin arttyrý jáne bilim berý sektorynyń eksporttyq áleýetin arttyrý», - deıdi mınıstr.
Onyń sózine qaraǵanda, bul óz kezeginde joǵary bilim berýdiń eýropalyq aýmaǵyna ótýge yqpal etpek.
«Oǵan qosa, Qazaqstan Respýblıkasynyń bilim berýdi damytýdyń 2011-2020 jyldarǵa arnalǵan membaǵdarlamasy bizdiń aldymyzǵa joǵary bilimniń qurylymy men mazmunyn Bolon protsesiniń parametrlerine sáıkestendirý arqyly joǵary bilim berýdiń eýropalyq aýmaǵymen yqpaldastyrý boıynsha maqsattardy qoıyp otyr», - dep túıdi sózin A. Sárinjipov.
