Qazaqstanda joǵary suranysqa ıe dári-dármekter shyǵarylýda - Erhat Esqalıev

NUR-SULTAN. QazAqparat – Qazaqstandaǵy óndirýshiler suranysy joǵary dári-dármekti shyǵara bastady. Bul týraly «SQ-Farmatsııa» JShS-nyń basqarma tóraǵasy Erhat Esqalıev aıtty, dep habarlaıdy QazAqparat tilshisi.

«Pandemııany eskere otyryp, óz óndirisin maksımaldy qýatqa jáne úsh aýysymdy jumys formatyna burǵan bizdiń otandyq taýar óndirýshilerge alǵysymdy bildirgim keledi. Óndirýshilerdiń dári-dármekteri tikeleı konveıerden aýrýhanalarǵa jóneltiledi. Óndiris asa suranysqa ıe preparattarǵa qaıta formattaldy. KVI-di emdeý úshin paıdalanylatyn preparattardyń 43 ataýyn (jartysyn) otandyq taýar óndirýshiler shyǵarady», – dedi E. Esqalıev Ortalyq kommýnıkatsııalar qyzmetinde.

Osy oraıda ol QR Úkimeti farmatsevtıkalyq ónerkásipti damytýdyń 2025 jylǵa deıingi keshendi josparyn qabyldaǵanyn, bul turǵyda eldiń dári-dármek qaýipsizdigin qamtamasyz etýge múmkindik beretinin atap ótti.

«Otandyq óndiristi damytý úshin yntalandyrý baǵytynda TOP-50 BıgFarmanyń iri álemdik farmatsevtıka ındýstrııasymen, ıaǵnıPfizer, Bayer, Sanofi sııaqty alyptarmen ózara is-qımyldy damytý eskerilgen. R&D ortalyqtary úlgisindegi iri medıtsınalyq joǵary oqý oryndarynyń ǵylymı zerthanalaryn tartý, otandyq ǵylymı-zertteý ınstıtýttaryn, sondaı-aq olardy erkin ekonomıkalyq jáne ındýstrııalyq aımaqtarda óristetý qarastyrylǵan», - dedi «SQ-Farmatsııa» basshysy.