Qazaqstanda joǵary oqý oryndary arasynda biryńǵaı elektrondyq kitaphana qurylady
ALMATY. Qarashanyń 9-y. QazAqparat /Erbol Azanbek/ - Búgin Almatydaǵy Q.Sátbaev atyndaǵy Qazaq ulttyq tehnıkalyq ýnıversıtetinde (QazUTÝ) «Joǵary jáne arnaýly orta oqý oryndaryndaǵy kitaphanalardyń elektrondyq resýrstary» atty ǵylymı-ádistemelik semınar ótti,
dep habarlaıdy QazAqparat.
QazUTÝ-diń 75 jyldyq mereıtoıyna arnalǵan semınar barysynda qazaqstandyq joǵary oqý oryndarynyń álemdik ǵylymı resýrstarǵa qol jetkizýi, respýblıkalyq JOO aralyq elektrondyq kitaphana jasaý, QazUTÝ-dyń ǵylymı kitaphanalarynyń aqparattyq resýrstarynyń erekshelikteri máseleleri talqylandy.
QR Oqý oryndary qaýymdastyǵynyń atqarýshy dırektory Seıitjapar Arpabekovtyń aıtýynsha, qazirgi kezde elimizde qazaq tilindegi kitaptar men oqý quraldary tapshy. «Biz osyǵan baılanysty kitaphanalardyń elektrondyq júıesin qurý qajet degen sheshimge keldik. Bul baǵytta respýblıkalyq JOO aralyq elektrondy kitaphana qurý týraly memorandým jasastyq. Buǵan elimizdegi 50-ge jýyq JOO-lardyń ókilderi qol qoıdy», deıdi S.Arpabekov.
Onyń aıtýynsha, barlyq joǵary oqý oryndaryna qazirgi kezde elektrondyq kitaphana jasaýǵa arnalǵan nusqaý berilgen. «Elektrondyq kitaphana joǵary oqý oryndarynda jasalady jáne árbir JOO oǵan ne engizý kerektigin ózderi anyqtaıdy. Menińshe ol jerdegi málimetter bazasyna basqa kitaphanalarda joq, professor-oqytýshy quramnyń eńbekteri engizilýi kerek», deıdi S.Arpabekov.
