Qazaqstanda joǵary táýekel deńgeıindegi JI júıelerine mindetti tekserý men aýdıt engiziledi
ASTANA. KAZINFORM — Qazaqstanda joǵary táýekel deńgeıine jatatyn jasandy ıntellekt júıeleriniń senimdi tizbesin qalyptastyrý qaǵıdalary bekitildi.
Tıisti buıryqqa Premer-mınıstrdiń orynbasary — Jasandy ıntellekt jáne tsıfrlyq damý mınıstri qol qoıdy.
Qujatqa sáıkes, salalyq memlekettik organdar óz quzyreti aıasynda mundaı júıelerdiń tizbesin qalyptastyrady. Bul tizimder jasandy ıntellekt tehnologııalaryna degen senimdi arttyrýǵa jáne olardy qoldanýdyń tıimdi tájirıbelerin keńinen taratýǵa baǵyttalǵan. Tizimder memlekettik organdardyń resmı ınternet-resýrstarynda turaqty túrde jarııalanyp otyrady.
Tizimge engizý júıe ıesiniń nemese quqyq ıelenýshiniń ótinishi negizinde júzege asyrylady. Ol úshin ótinish berýshi tıisti ótinishpen birge avtorlyq quqyqty rastaıtyn qujattardy (tirkeý kýáligi nemese avtorlyq shart), sondaı-aq oń aýdıtorlyq qorytyndy usynýy qajet.
Ótinishterdi salalyq memlekettik organ 10 jumys kúni ishinde qaraıdy. Qaraý barysynda júıe týraly málimetterdiń tolyqtyǵy, onyń maqsaty, atqaratyn qyzmeti men qoldanylý tártibi, sondaı-aq quqyq belgileıtin qujattardyń jáne aýdıtorlyq qorytyndynyń bolýy tekseriledi.
Talaptarǵa sáıkes kelgen jaǵdaıda júıe tizimge engiziledi. Bul týraly aqparat bes jumys kúni ishinde memlekettik organnyń resmı ınternet-resýrsynda jarııalanyp, ony kórý jáne júkteý múmkindigi beriledi.
Qujattarda sáıkessizdik anyqtalǵan jaǵdaıda ótinish berýshige tıisti habarlama joldanady. Kemshilikter joıylǵannan keıin qujattardy qaıta tapsyrýǵa bolady. Bul rette qaıta qaraý merzimi bes jumys kúninen aspaıdy.
Tizimder jańartylǵan saıyn memlekettik organdardyń ınternet-resýrstarynda jarııalanyp otyrady.
Atalǵan buıryq 2026 jylǵy 26 sáýirden bastap qoldanysqa engiziledi.
Aıta keteıik, Qazaqstan aqparattyq qaýipsizdik pen tsıfrlyq júıelerge jańa talaptar engizdi.
