Qazaqstanda joǵary oqý oryndaryna arnalǵan jańa qabyldaý emtıhany ázirlenip jatyr
ASTANA. KAZINFORM — Búgin QR Ǵylym jáne joǵary bilim mınıstrliginde halyqaralyq ETS (Educational Testing Service) uıymynyń ókilderimen kezdesý ótti. Jıyn barysynda Admissions Insight Test (AIT) jańa qabyldaý emtıhanyn ázirleý jónindegi birlesken jumystyń aralyq qorytyndylary shyǵaryldy.
Ǵylym jáne joǵary bilim mınıstri Saıasat Nurbekke qoldanystaǵy baǵalaý júıesine júrgizilgen taldamalyq zertteýlerdi qamtıtyn jobanyń alǵashqy eki kezeńiniń nátıjeleri, sondaı-aq eki aptaǵa sozylǵan qarqyndy birlesken jumystyń qorytyndysy retinde ázirlengen AIT jańa qabyldaý emtıhany tujyrymdamasynyń jobasy tanystyryldy.
Jobanyń barlyq kezeńinde ETS sarapshylary Ulttyq testileý ortalyǵynyń mamandarymen tyǵyz yntymaqtastyqta jumys istedi. Emtıhan tujyrymdamasy bilim berý salasyndaǵy halyqaralyq baǵalaý tájirıbesi men qazaqstandyq mamandardyń bilimdi baǵalaý júıesindegi kásibı tájirıbesin ushtastyrý nátıjesinde ázirlendi.
Tanystyrylym kásibı pikirtalas formatynda ótip, jańa emtıhan modelin qalyptastyrýdyń negizgi tásilderi jan-jaqty qarastyryldy. Mınıstr jobany odan ári jetildirýge qatysty birqatar usynystar men usynymdaryn bildirdi. Ásirese XXI ǵasyr quzyretterin baǵalaýǵa baǵyttalǵan emtıhannyń modýldik arhıtektýrasyna erekshe nazar aýdaryldy.
Talqylaý barysynda mektep baǵdarlamasyn meńgerý deńgeıin ǵana emes, sonymen qatar synı oılaý, analıtıkalyq qabilet, aqparatpen jumys isteý, sheshim qabyldaý jáne bilimdi jańa jaǵdaıda qoldaný daǵdylaryn baǵalaýdy kózdeıtin tujyrymdama qoldaý tapty.
Kezdesýde jańa emtıhandy ázirleýdiń alǵysharttaryna da erekshe toqtaldy. Saıasat Nurbek AIT ázirleý ıdeıasy Education World Forum aıasynda ETS uıymynyń bas atqarýshy dırektory Amıt Sevakpen ótken kezdesýden keıin damı bastaǵanyn atap ótti. Qazaqstanda jetekshi sheteldik joǵary oqý oryndarynyń fılıaldary belsendi ashylyp jatqan jaǵdaıda, nátıjeleri otandyq joǵary oqý oryndary men elimizde jumys isteıtin sheteldik ýnıversıtetterdiń fılıaldary tarapynan birdeı moıyndalatyn biryńǵaı baǵalaý quralyn qalyptastyrý qajettiligi týyndady.
— Sonymen qatar AIT tek joǵary oqý oryndarynyń qajettilikterin óteýge ǵana baǵyttalmaǵany atap ótildi. Jańa emtıhannyń negizgi mindetteriniń biri — talapkerdiń bilim berý áleýetin aıqyndaý, onyń bilim berý jáne kásibı baǵytyn sanaly túrde tańdaýyna yqpal etý, sondaı-aq joǵary oqý oryndaryna qabyldaý tetikterin jetildirý. Sonymen birge emtıhan nátıjeleri bilim granttaryn bólý jónindegi sheshimderdi qabyldaý kezinde qosymsha qural retinde paıdalanylýy múmkin. Kezdesý barysynda jańa qabyldaý emtıhanyn ázirleý, aprobatsııalaý jáne kezeń-kezeńimen engizý merzimi ishinde qoldanystaǵy UBT júıesi tolyq saqtalatyny atap ótildi, — delingen mınıstrlik habarlamasynda.
Kezdesý qorytyndysynda mınıstr adamı kapıtaldy damytý eldiń ornyqty damýynyń negizgi faktorlarynyń biri ekenin atap ótti. Osyǵan baılanysty halyqaralyq tásilderge sáıkes keletin zamanaýı qabyldaý emtıhanyn ázirleý ulttyq joǵary bilim berý júıesin jetildirýdiń mańyzdy baǵyty retinde qarastyrylatynyn aıtty.
QR Ǵylym jáne joǵary bilim mınıstrligi, Ulttyq testileý ortalyǵy jáne ETS uıymynyń birlesken jumysy aldaǵy ýaqytta da jalǵasady. Jobalyq sheshimder sarapshylar talqylaýynyń nátıjeleri, aprobatsııa qorytyndylary jáne akademııalyq qaýymdastyqtyń usynystary negizinde odan ári jetildiriletin bolady. Jobanyń túpki maqsaty — Qazaqstandaǵy barlyq talapkerler úshin teń múmkindik beretin, halyqaralyq standarttarǵa saı, obektıvti ári zamanaýı baǵalaý júıesin qalyptastyrý.
Aıta ketelik UBT-nyń jańa formatyn engizý 2027 jyly pedagogıkalyq baǵyttan bastalady.
