Qazaqstanda joǵarǵy medıtsınalyq kolledjder qurylmaq - DSÁDM
«Densaýlyq saqtaý jáne áleýmettik damý mınıstrligi «Meıirgerlik is» mamandyǵy boıynsha qoldanbaly bakalavrıatty engizý boıynsha jobany júzege asyrýdy 2014 jyly eksperımentaldy tártipte 6 memlekettik medıtsınalyq kolledj bazasynda: Astana qalasynyń medıtsınalyq kolledji, Kókshetaý medıtsınalyq kolledji, Qyzylorda medıtsınalyq kolledji, Pavlodar medıtsınalyq kolledji, Respýblıkalyq orta medıtsınalyq jáne farmatsevtıka qyzmetkerlerin daıyndaý men qaıta daıarlaý kolledji, Batys Qazaqstan medıtsınalyq kolledji bastady», - delingen vedomstvo habarlamasynda.
Atalǵan oqý oryndarynda fın sarapshylarynyń qatysýymen ázirlengen «Meıirgerlik is» mamandyǵy boıynsha qoldanbaly bakalavrıat baǵdarlamasy engizilmek.
QR Densaýlyq saqtaý salasyn damytýdyń 2016-2019 arnalǵan «Densaýlyq» memlekettik baǵdarlamasyn júzege asyrý aıasynda QR DSÁDM mamandary JAMK jáne Lahti (Fınlıandııa) qoldanbaly ǵylymdar ýnıversıtetteriniń áriptesterimen birlese otyryp, QR-daǵy meıirgerlik bilim berý júıesin jetildirýdiń 2016-2019 jyldarǵa arnalǵan jol kartasyn jasady.
Qoldanbaly bakalavrıat baǵdarlamasy eýropalyq dırektıvalarǵa saı dýaldy bilim berý qaǵıdalaryn qarastyrady. Onyń ishinde oqý saǵattarynyń 60-70%-dan kem emes, (oqý merzimi 3,5 jyl) kóleminde bilikti tálimgerdiń basshylyǵymen emhanalyq bazada óndiristik praktıkany júzege asyrý da bar. Atalǵan baǵdarlama EýroOdaq elderinde keńinen taralǵan, sonymen qatar, praktıkalyq ázirligi basym joǵary bilikti meıirgerlerdi daıyndaýǵa baǵyttalǵan.
Vedomstvoda aıtyp ótkendeı, «Meıirgerlik is» mamandyǵy boıynsha qoldanbaly bakalavrıat joǵarǵy medıtsınalyq kolledj túlekteri aýrýlardy dárigerge deıingi tekserý, aldyn ala dıagnoz qoıý, beıindi mamandaryna konsýltatsııaǵa baǵyttaý, balalar jáne eresek turǵyndar patronajy, dárigerdiń baqylaýymen dárilik taǵaıyndaýlardy jazý syndy meıirgerlik qabyldaý úshin kásibı mashyqtardy ıgerip shyǵady.
Qazirgi tańda fın jáne otandyq mamandar «Meıirgerlik is» mamandyǵy boıynsha qoldanbaly bakalavrıattyń biriktirilgen baǵdarlamasyn ázirleýde. Atalǵan baǵdarlama boıynsha budan buryn bilim alǵan meıirgerler bir jarym jyldyń ishinde qosymsha oqý arqyly óz kásibı mashyqtaryn damyta alady.
Eske sala keteıik, qazirgi tańda Qazaqstanda 26 memlekettik jáne 37 jeke medıtsınalyq kolledj bar. Olar jyl saıyn orta eseppen 12 myń orta býyn medıtsınalyq qyzmetker daıyndaıdy. Búginde orta medıtsınalyq personal sala qyzmetkerleriniń eń kóp sanatyn quraıdy, olardyń sany shamamen 160 myń maman.