Qazaqstanda joǵalyp bara jatqan mamandyqtar qalaı saqtalmaq – sarapshy
ASTANA. KAZINFORM – Memleket basshysy Qasym-Jomart Toqaev atap ótkendeı, qazirgi oqý baǵdarlamalary men standarttary jańaryp úlgergenshe, naryqtaǵy mamandyqtardyń ózi transformatsııalanyp úlgeredi. Osy oraıda QR Oqý-aǵartý mınıstrligine qarasty «Talap» uıymy prezıdentiniń keńesshisi Qadyrbek Bóribekuly Jibek Joly telearnasynyń «Búgin.LIVE» baǵdarlamasynda bolashaqtyń mamandyqtary, qurylatyn jańa Ulttyq ortalyq jáne halyqaralyq tájirıbeniń tıimdiligi týraly mańyzdy aqparatpen bólisti.
Elimizde keıingi jyldary kásiptik-tehnıkalyq bilim berý salasyna memlekettik deńgeıde úlken basymdyq berilip keledi. Prezıdenttiń 2025 jyldy «Jumysshy mamandyqtary jyly» dep jarııalaýy da osy strategııalyq baǵyttyń jalǵasy. Óıtkeni bilikti jumysshy kúshisiz otandyq óndiristi ilgeriletý múmkin emes. Sol sebepti bıylǵy jyldyń 11 aqpanynda ótken Úkimettiń keńeıtilgen otyrysynda Memleket basshysy maman daıarlaý isin túbegeıli ózgertetin jańa qurylym qurýdy tapsyrǵan edi.
– Úkimettiń keńeıtilgen otyrysynda Prezıdent úkimetke mamandardy transformatsııalaıtyn arnaıy Ulttyq ortalyq qurý týraly tapsyrma berdi. Qazir bul mindet úsh birdeı vedomstvoǵa – Oqý-aǵartý, Eńbek jáne halyqty áleýmettik qorǵaý, sondaı-aq, Ǵylym jáne joǵary bilim mınıstrlikterine júktelgen. Prezıdent bul ortalyq elimizdegi úlken bıznes ókilderimen jáne iri kompanııalarmen konsortsıým jasaý arqyly qurylýy kerek dep naqtylady. Zań boıynsha konsortsıým zańdy tulǵa bolmaǵanymen, ol – elimizdiń ekonomıkasyn damytyp otyrǵan alpaýyt kásiporyndardyń basyn biriktirip, úlken strategııalyq jobalardy birlese sheshýdiń tıimdi tetigi, - dedi «Talap» uıymy prezıdentiniń keńesshisi Qadyrbek Bóribekuly.
Sarapshynyń aıtýynsha, jasandy ıntellekt pen jappaı tsıfrlandyrý dáýirinde mundaı ortalyqtyń qurylýy kásiporyndardyń ózi úshin de úlken qajettilik. Óıtkeni, naryqqa qandaı maman kerek ekenin bilim ordalary emes, tapsyrys berýshi óndiris oryndarynyń ózi aıtýy tıis.
Búginde otandyq jastardyń da tańdaýynda aıtarlyqtaı ózgeris bar. Gýmanıtarlyq baǵyttarǵa qaraǵanda, tehnıkalyq mamandyqtarǵa degen qyzyǵýshylyq eselep artqan.
Elimizde jańadan ashylyp jatqan avtokólik zaýyttary, iri qural-saıman shyǵaratyn óndiris oryndary jastar úshin joǵary jalaqy men jaqsy áleýmettik jaǵdaı usynyp otyr.
– Bul qurylatyn ortalyq, birinshi kezekte, tehnologııanyń áserinen joǵalyp ketýi múmkin mamandyqtardy ýaqytyly transformatsııalap, olardy eńbek naryǵynda jańa sapada saqtap qalýmen aınalysady. Bilim berý men óndiris arasyndaǵy alshaqtyqty joıyp, kadrlardy zaman aǵymyna saı daıarlaýdyń jańa modelin qalyptastyrady, - dedi Qadyrbek Bóribekuly.
Aıta keteıik, buǵan deıin, Eńbek naryǵynda joıylýy múmkin mamandyqtar jaıly sarapshy pikirin jazǵan edik.
