Qazaqstanda joǵalǵan nemese urlanǵan qujattardy qalaı qalpyna keltirýge bolady
QYZYLORDA. KAZINFORM – Ózińizdiń kim ekenińizdi dáleldeıtin qujattardy urlatyp nemese joǵaltyp aldyńyz delik. Mundaıda ne isteý kerek? Suraǵymyzǵa Qyzylorda qalalyq №1 halyqqa qyzmet kórsetý ortalyǵynyń basshysy Dınara Qazanǵapova jaýap berdi.
Onyń aıtýynsha, adam jeke basyn kýálandyratyn qujatty joǵaltyp alǵan jaǵdaıda birden jaqyn mańdaǵy halyqqa qyzmet kórsetý ortalyǵyna barýy kerek. Al eger urlatyp alǵan bolsa, áýeli polıtsııaǵa júginip, sony rastaıtyn talon-habarlandyrý alady.
– HQKO-da qujatty joǵaltqanyńyzdy, memlekettik baj salyǵyn tólegenińizdi kórsetip, ótinish jazasyz. Birinshi ret qalpyna keltirý úshin 0,2 AEK, ekinshi márte qaıtalansa, 1 AEK tóleısiz. Qujatty rásimdeý úshin qolyńyzda qalǵan qujattar jetkilikti. Ol 15 jumys kúni ishinde daıyn bolady. Eger asyǵys deseńiz, shuǵyl qyzmet túrin paıdalana alasyz, - dedi Dınara Qazanǵapova.
HQKO qyzmetkerleri jeke basyn kýálandyratyn qujatsyz bir aıdan astam ýaqyt júrgen adamǵa 7 AEK kóleminde aıyppul salynatynyn eskertti.
Joǵalǵan pasportty da dál osylaı qalpyna keltiresiz. Ol úshin ótinish beresiz. Al urlatyp alsańyz, polıtsııadan talon-habarlama, jeke basyńyzdy kýálandyratyn nemese ýaqytsha qujat kerek. Sondaı-aq memlekettik baj salyǵyn tóleısiz.
Onyń quny pasporttyń túrine baılanysty: 36 betten turatyny úshin 8 AEK, 16 jasqa tolmaǵan balalarǵa arnalǵan 24 bettik úshin sonyń jartysyn tóleısiz.
Pasport 15 jumys kúni ishinde qolyńyzǵa tıedi jáne odan erte alýdyń joly qarastyrylǵan.
Eger jeke basyńyzdy kýálandyratyn qujatty qosa joǵaltqan bolsańyz, ýaqyt únemdeý úshin ekeýin birge rásimdegen durys.
– Dıplom, attestat nemese bilim alǵanyńyzdy aıǵaqtaıtyn ózge de qujattardy qalpyna keltirý tsıfrly qyzmettiń arqasynda edáýir jeńildedi. eGov portaly nemese eGov Mobile qosymshasynda elektrondy tsıfrly qoltańba qoıý nemese bıometrııa arqyly elektrondy usynys bere alasyz. Ol úshin oqý orny týraly málimetti kórsetesiz, nebári 15 jumys kúni aralyǵynda telnusqa daıyn. Qajet bolsa, jeke basyńyzdy kýálandyratyn qujat nemese týý týraly kýálikti, sondaı-aq oqý ornyna qatysty málimetti alyp, bizdiń ortalyqqa kelesiz. Eger oqyǵan jerińiz jabylyp qalǵan bolsa, arhıvten suratamyz. Biraq ol kezde telnusqany 30 jumys kúni shamasynda kútesiz, - deıdi ortalyq basshysy.
HQKO qyzmetkerleri aldymen jeke basyn kýálandyratyn qujatty qalpyna keltirýge keńes beredi. Óıtkeni basqa protsedýra kezinde sony suraıdy. Qujattyń joǵalǵanyn polıtsııa nemese HQKO-da tirketý kerek. Bul siz týraly derekti zańsyz paıdalaný múmkindigin tómendetedi.
Buǵan deıin Qazaqstan azamattary budan bylaı LegalExpert.kz tegin onlaın servısi arqyly JI-zańger kómegine júginý múmkindigine ıe bolǵanyn jazǵanbyz.