Qazaqstanda joǵalǵan balalardy izdeý portaly ashylady
ASTANA. QazAqparat - Balalardyń ǵalamtor qaýipsizdigin qamtamasyz etý ján ony retteý máselelerine arnalǵan dóńgelek ústelde Qazaqstannyń Ǵalamtor qaýymdastyǵynyń prezıdenti Shavkat Sabırov bıyl joǵalǵan balalardy izdeý portalynyń qurylatynyn aıtty.
«Bıyl saıtty qurýdy josparlap otyrmyz. Qolymyzda qazir contorterror.kz degen saıt bar. Ekinshi saıtty biz aqparattyq-túsindirý jarııalanymdary men joǵalǵan balalar jaıly portal qurý maqsatynda daıyndaımyz. Quqyqtyq statıstıka komıteti men Bas prokýratýranyń arnaıy esebimen tyǵyz jumys jasaımyz. Solardan joǵalǵan balalar jaıly málimetter alatyn bolamyz», - deıdi ol.
Onyń aıtýynsha, búginde Qazaqstanda 5 myńdaı joǵalǵan bala tirkelgen.
«Osyǵan saı biz atalmysh aqparatty ǵalamtorǵa salyp, ózge de elderge taratyp, máselen, Reseı sekildi elderge málimetter jiberetin bolamyz. Ǵalamtordaǵy sýıtsıdtik toptarmen birlese jumys istep, ásirese jasóspirimderge qatty kóńil bólemiz. Ǵalamtor keńistigindegi monıtorıng, aldyn alý jumystaryn, semınarlar men konferentsııalar uıymdastyramyz. Bizdiń oıymyzsha, bul ispen quqyq qorǵaý jáne memlekettik organdarmen qatar, biz sııaqty qoǵamdyq uıymdardyń da aınalysqany abzal», - deıdi Sh.Sabırov.
Esterińizge sala keteıik, dóńgelek ústelde balalar men jasóspirimderdiń ǵalamtordaǵy qaýipsizdik negizderi, pedagogtar men ata-analar úshin balalar men jasóspirimderdiń sandyq quraldardy paıdalaný qabiletin arttyrý boıynsha bilim baǵdarlamasy talqylanyp, túrli usynystar aıtyldy. Sharaǵa memlekettik organdardyń, balalar quqyǵyn qorǵaý jáne saqtaý boıynsha ýákiletti organdardyń, sarapshylar qaýymdastyǵynyń, baılanys operatorlary men hostıng-provaıderlerdiń, qazaqstandyq tanymal ǵalamtor resýrstarynyń, qyzmeti balalar quqyǵyn qorǵaýǵa baǵyttalǵan qoǵamdyq uıymdardyń ókilderi qatysty.
Shara Ǵalamtor qaýymdastyǵynyń uıymdastyrýymen QR Prezıdenti janyndaǵy OKQ qoldaýymen ótti, dep habarlaıdy strategy2050.kz.
