Qazaqstanda jynys aýystyrýǵa tyıym salý usynyldy

ASTANA. KAZINFORM – Májilis depýtaty Magerram Magerramov bastaǵan birqatar halyq qalaýlysy elimizde jynys aýystyrýǵa zańmen tyıym salýdy usyndy.

- Halyq densaýlyǵy jáne densaýlyq saqtaý júıesi týraly kodekske sáıkes 21 jasqa tolǵan, psıhıkalyq minez-qulqynda aqaý joq jandar jynysyn aýystyrýǵa quqyǵy bar. Alaıda, «jynystyq sáıkestendirý buzylysy bar adam» uǵymynyń ózi qandaı da bir buzýshylyqtyń baryn kózdep otyr. Bul adamdarda fızıkalyq aýytqýlar bolmaǵandyqtan, buzylys psıhıkasynda nemese minez-qulqynda dep boljaýǵa bolady. Tıisinshe, psıhıkalyq nemese minez-qulyq aspektileri buzylǵan adamnyń saý denesine gormonaldy jáne hırýrgııalyq ota jasaýdy aqtaýǵa bolmaıdy, - dep Magerram Magerramov Úkimet basshysy Oljas Bektenovtiń atyna depýtattyq saýal joldaı otyryp.

Osy oraıda M.Magerramov Úkimet basshysynan kelesi saýaldarǵa jaýap berýin surady:

1. Eger siz er adamnan áıeldi, al áıelden er adamdy hırýrgııalyq túzetý arqyly jynysyn aýystyrýǵa jol berseńiz, «Deni saý ult» ulttyq jobasyn qalaı júzege asyryp otyrsyz?

2. Minez-qulqynda, psıhıkasynda buzylýlar bar jandar nelikten hırýrgııalyq jolmen emdeledi?

3. Jynysty aýystyrý boıynsha qansha ota jasaldy? Olardyń ishinde qansha adam jynysyn keri qaıtarýǵa nıet tanytty?

4. Búginde qansha adam jynysyn aýystyrýǵa ótinish berdi?

5. Mundaı manıpýlıatsııalar negizgi medıtsınalyq prıntsıpter men ult densaýlyǵyna keri áser etpeı me?

- QKP fraktsııasy jynysyn aýystyrýǵa ruqsat berý bóliginde zańnama ózgergenge deıin osy manıpýlıatsııaǵa tyıym salýdy talap etedi, - deıdi Májilis depýtaty.

Aıta ketsek, AQSh úkimeti tek eki jynysty – erkek pen áıeldi resmı túrde tanıdy.