Qazaqstanda jynys aýystyrý operatsııasy tirkelgen joq – QR DSM

ASTANA. KAZINFORM – Bul týraly QR Densaýlyq saqtaý mınıstrligi resmı joldanǵan saýalǵa jaýabynda aıtty.

- Búgingi tańda medıtsınalyq aqparattyq júıe arqyly qalyptasqan resmı statıstıka boıynsha elimizde jynys aýystyrý operatsııasy tirkelgen joq,- dep málimdedi vedomstvo ókilderi.

Sonymen qatar QR Densaýlyq saqtaý mınıstri mindetin atqarýshynyń 2020 jyldyń 30 qazanyndaǵy № QR DSM-170/2020 «Mindetti áleýmettik medıtsınalyq saqtandyrý júıesindegi kepildendirilgen tegin medıtsınalyq kómek aıasynda kórsetiletin medıtsınalyq qyzmetterdiń tarıfterin bekitý týraly» buıryǵyna sáıkes, jynysty aýystyrý boıynsha plastıkalyq operatsııalardy júzege asyrý medıtsınalyq qyzmeti tarıfter tiziminde joq.

Osyǵan deıin Májilis depýtaty Magerram Magerramov bastaǵan birqatar halyq qalaýlysy elimizde jynys aýystyrýǵa zańmen tyıym salýdy usynǵany týraly jazdyq.