Qazaqstanda JI mektep baǵdarlamasyna keńinen engiziledi — Prezıdent
ASTANA. KAZINFORM — Prezıdent Qasym-Jomart Toqaev Sheteldik ınvestorlar keńesiniń 38-shi plenarlyq otyrysynda Qazaqstannyń adamı kapıtaldy damytýǵa dáıekti túrde ınvestıtsııa quıyp otyrǵanyn málimdedi.
Elordada Alem.ai halyqaralyq ortalyǵynda TUMO jáne Tomorrow School jańa býyn mektepteri ashyldy.
— Telegram jáne Presight sekildi halyqaralyq seriktestermen birge zamanaýı zerthanalar quryldy. Jasandy ıntellekt Qazaqstannyń bilim berý júıesine keńinen engizilip jatyr. Men jaqynda qol qoıǵan Jarlyqqa sáıkes, JI orta bilimdi jańǵyrtýdyń negizgi elementine aınalmaq. Árıne, bul joba pedagogterdi almastyra almaıdy, biraq ustazdardyń múmkindigin keńeıtedi. Jarlyqta derbes oqytý tetigin qurý, tsıfrlyq ınfraqurylymdy nyǵaıtý, normatıvtik-quqyqtyq bazany jetildirý jáne bilim berý standarttaryn jańǵyrtý qarastyrylǵan, — dedi Memleket basshysy Astanadaǵy Táýelsizdik saraıynda.
Prezıdent pılottyq joba el kólemine taratylatynyn, bul qala men aýyl mektepteriniń bilim alshaqtyǵyn qysqartyp, JI dáýirinde ár balaǵa joǵary sapaly bilim berýdi kózdeıtinin basa aıtty.
Jasandy ıntellekt memlekettik basqarý tıimdiliginiń sheshýshi faktoryna aınalýda. Qazaqstan jańǵyrý úderisinde kósh bastaý úshin aldyn ala qımyldap, tıisti ınstıtýtsıonaldyq ortany qalyptastyryp jatyr.
JI salasyndaǵy álemge áıgili sarapshy, Jasandy ıntellektini damytý jónindegi keńes múshesi doktor Lı Kaı Fý jaqynda Astanadaǵy Alem.ai halyqaralyq ortalyǵynda memlekettik organdardyń joǵary laýazymdy basshylaryna oqý semınaryn ótkizdi. Semınar jasandy ıntellektini memlekettik basqarýda strategııalyq turǵydan paıdalaný, JI-ge baǵdarlanǵan operatsııalyq modelderdi, JI agentterdi qoldaný jáne Qazaqstandaǵy ulttyq tehnologııalyq stekti damytý máselelerin qamtydy.
— Memlekettik qyzmetshilerdi udaıy oqytý jasandy ıntellektini jedel engizýge yqpal etip, memlekettik basqarýdyń tıimdiligin arttyra túsedi. Budan bólek, Qazaqstanda óńirimizdegi alǵashqy arnaýly jasandy ıntellekt ýnıversıteti bilim alýshylardy qabyldaıdy. Biregeı joǵary oqý orny ozyq zertteýlerdiń, ınnovatsııa men joǵary bilikti maman daıarlaýdyń ortalyǵyna aınalmaq. Bilim men tehnologııaǵa qarjy quıyp, daryndylardy qoldaı otyryp, jasandy ıntellekt ulttyq ekojúıesiniń berik negizin qalaımyz, — dedi Qasym-Jomart Toqaev.
Buǵan deıin Qasym-Jomart Toqaev Sheteldik ınvestorlar keńesiniń jańa múshelerin tanystyrǵan edi.
