Qazaqstanda jyljymaıtyn múlik mámilelerin rásimdeý tártibi ózgerdi
ASTANA. KAZINFORM – 8 qyrkúıekten bastap Qazaqstanda jyljymaıtyn múlikke qatysty mámilelerdi notarıaldy kýálandyrý tártibi ózgerdi. Endi memlekettik tirkeýge jatatyn múlikti ıelikten shyǵarý jáne kepilge berý týraly sharttar jyljymaıtyn múlik ornalasqan jerdegi notarıýsta kýálandyrylýy tıis.
Jańa talap «Notarıat týraly» zańnyń 54-babynda bekitilgen.
Tıisti ózgerister 2026 jylǵy 8 shildede qabyldanǵan zańmen engizildi. Oǵan sáıkes, memlekettik tirkeýge jatatyn jyljymaıtyn múlikti ıelikten shyǵarý jáne kepilge berý týraly sharttar múlik ornalasqan jerde kýálandyrylýy qajet.
Qujat shilde aıynda jarııalanyp, 60 kúntizbelik kún ótken soń, ıaǵnı 2026 jylǵy 8 qyrkúıekte kúshine endi.
Jyljymaıtyn múliktiń ornalasqan jeri notarıýstyń tıisti notarıattyq áreketti júzege asyra alatyn aýmaǵyn aıqyndaıdy. Zańnyń 20-babyna sáıkes, notarıattyq okrýg bir oblystyń, respýblıkalyq mańyzy bar qalanyń nemese astananyń aýmaǵyn qamtıdy.
Sonymen qatar «Notarıat týraly» zańnyń 21-babyna da ózgerister engizildi. Endi notarıýstyń aýmaqtyq qyzmet shekarasy saqtalýǵa tıis notarıattyq áreketter tizimine zańnyń 54-babynda kózdelgen áreketter de tikeleı engizildi. Notarıattyq keńseden tys jerde notarıattyq áreketter jasaýǵa da tek tıisti notarıattyq okrýg sheginde ruqsat etiledi.
Notarıýs Karına Tólepova jańa talaptyń azamattarǵa is júzinde qalaı áser etetinin túsindirdi.
– Endi jyljymaıtyn múlikti satý, syıǵa tartý nemese kepilge berý kezinde tek sol nysan ornalasqan qaladaǵy nemese óńirdegi notarıýsqa júginýge bolady. Mysaly, Almatydaǵy páterge qatysty mámile Almatydaǵy notarıýsta, al Shymkenttegi úıge qatysty mámile Shymkenttegi notarıýsta rásimdelýi kerek. Mundaı mámileni basqa qaladaǵy notarıýs arqyly rásimdeý endi múmkin emes, – dep túsindirdi ol.
Osylaısha, jyljymaıtyn múlik ıesi men mámileniń ekinshi taraby notarıýsty tańdaǵan kezde nysannyń ornalasqan jerin eskerýi qajet.
Aıta keteıik, jyljymaıtyn múlikke mekenjaı berý erejeleri jańartyldy.
