Qazaqstanda jyljymaıtyn múlik boıynsha biryńǵaı tsıfrlyq baza quryldy

PETROPAVL. KAZINFORM - Qazaqstandaǵy jer ýchaskesi men jyljymaıtyn múlikke qatysty barlyq málimetti tsıfrlyq platformadan tabýǵa bolady. 

«Jyljymaıtyn múliktiń biryńǵaı memlekettik kadastry» (JMBMK) aqparattyq júıesi elimizde sáýir aıynan bastap engizilip, qazan aıynan tolyq iske kiristi.
Memlekettik qyzmet isteri agenttiginiń Soltústik Qazaqstan oblysy boıynsha departamentiniń basshysy Erjan Qarymsaqovtyń aıtýynsha, tsıfrlyq bazada, máselen, jer ýchaskesiniń ornalasqan jerin, naqty shekaralaryn, oǵan qoıylǵan shekteýlerdi (shekteý, kepil, servıtýt), menshik tarıhyn, kadastrlyq qunyn, kartadaǵy orny men qurylystardyń bar-joǵyn bilýge bolady.

- Buryn jyljymaıtyn múlik týraly aqparat ártúrli uıymdarda, qaǵaz arhıvterde, eski syzbalarda saqtalatyn. Qajetti derekterdi tabý úshin birneshe mekemeni aralaýǵa týra keletin. Azamattar ondaǵan anyqtama jınaýǵa májbúr bolatyn: aldymen ákimdikke, sodan keıin Halyqqa qyzmet kórsetý ortalyǵyna, odan qala berdi jer qatynastary bólimine barý kerek edi. Kóp jaǵdaıda birneshe apta kútýge týra keletin. Endi mundaı qajettilik joq — derekterdi jyldam, dál jáne onlaın formatta alýǵa múmkindik bar. Qazir barlyq málimet bir jerde — JMBMK aqparattyq júıesinde toptastyrylǵan. Bul aqparat jer satyp alatyndarǵa, úı salatyndarǵa, qujat resimdeıtin azamattarǵa jáne kásipkerlerge asa qajet, - deıdi Erjan Qarymsaqov. 

Departament basshysynyń aıtýynsha, tsıfrlyq baza arqyly jyljymaıtyn múlikti satyp almas buryn tekserip, qujattarynyń durystyǵyna kóz jetkizýge bolady. Bul alaıaqtyqtan qorǵanýǵa qosymsha múmkindik. Óıtkeni elektrondyq málimetterdi qoldan jasaý qaǵaz qujattarǵa qaraǵanda áldeqaıda qıyn.

- Memlekettik organdar da eldegi barlyq jer ýchaskeleri týraly naqty aqparat alady. Bul ruqsattardy jedel berýge, jerdi ádil bólýge, qujattardaǵy qatelerdi boldyrmaýǵa, qalalar men aýyldardyń damýyn josparlaýǵa múmkindik beredi. Qurylys salýshylar ýchaskeler týraly derekterdi jedel alady, bankter aqparatty teksere alady, notarıýstar qosymsha qujat jınamaı-aq mámilelerdi rásimdeıdi. Aqparattyq júıesi únemi jańartylyp otyrady: jańa kartalar, servıster, basqa memlekettik derekter bazalarymen ıntegratsııalar engizilip jatyr. Búgingi kúni osy qyzmet boıynsha 199 ótinish qaraldy, - deıdi Erjan Qarymsaqov.

Buǵan deıin jyljymaıtyn múlik obektilerine mekenjaı berý erejesi ózgeretinin jazǵan edik.