Qazaqstanda jylý-elektr ortalyqtarynyń 50 negizgi jabdyǵyna kúrdeli jóndeý aıaqtaldy
ASTANA. KAZINFORM – Qazaqstanda aldaǵy jylytý maýsymyna daıyndyq aıasynda elektr stantsııalaryndaǵy 50 negizgi jabdyqqa kúrdeli jóndeý tolyq aıaqtaldy, dep habarlaıdy Energetıka mınıstrligi.
Bul týraly Ortalyq kommýnıkatsııalar qyzmetinde ótken baspasóz konferentsııasynda Energetıka mınıstrligi Memlekettik energetıkalyq qadaǵalaý jáne baqylaý komıteti tóraǵasynyń orynbasary Ernar Hasenov málimdedi.
Onyń aıtýynsha, jylytý maýsymyna daıyndyq josparly rejımde júrip jatyr. Komıtet pen onyń aýmaqtyq departamentteri energetıkalyq nysandardaǵy jóndeý jumystarynyń sapasy men belgilengen merzimderdiń saqtalýyna turaqty monıtorıng júrgizip keledi.
Bıyl elektr stantsııalarynda 9 energııa blogyn, 55 qazandyq pen 51 týrbınany kúrdeli jóndeýden ótkizý josparlanǵan. Jóndeý naýqanyna 384 mlrd teńge qarastyryldy. Bul ótken jylmen salystyrǵanda 9%-ǵa kóp.
Qazirgi ýaqytta 3 energııa blogynda, 26 qazandyqta jáne 21 týrbınada jóndeý jumystary jalǵasyp jatyr. Al negizgi jabdyqtardyń 50 birliginde kúrdeli jóndeý tolyǵymen aıaqtalǵan. Olardyń qatarynda 4 energııa blogy, 28 qazandyq jáne 18 týrbına bar.
– Jylytý maýsymyna daıyndyq josparly rejımde júrgizilýde. Komıtet pen onyń aýmaqtyq departamentteri energetıkalyq nysandardaǵy jóndeý jumystarynyń sapasy men merzimderiniń saqtalýyna turaqty monıtorıng júrgizip keledi, – dedi Ernar Hasenov.
Elektr jelilerinde de aýqymdy jóndeý jumystary júrgizilgen. Búginge deıin 17,1 myń shaqyrym elektr berý jelisi kúrdeli jóndeýden ótti. Josparlanǵan 444 qosalqy stantsııanyń 404-inde jumystar aıaqtaldy. Bul jalpy kólemniń 91%-yn quraıdy. Budan bólek, 3 209 taratý pýnkti men transformatorlyq qosalqy stantsııa jóndeldi.
Jylý jelilerin jóndeý jáne rekonstrýktsııalaý boıynsha bıyl 377 shaqyrymdy qamtý josparlanǵan. Qazirgi ýaqytta jumystardyń oryndalý deńgeıi 89%-ǵa jetti. Jóndeý naýqany aıaqtalǵannan keıin jylý jelileriniń ortasha tozý deńgeıin 48%-ǵa deıin tómendetý kózdelip otyr.
Jylytý maýsymyna qajetti otyn qoryn jınaqtaý da jalǵasyp jatyr. Qazirgi kezde energııa kózderiniń qoımalarynda 4,2 mln tonna kómir jáne 131 myń tonna mazýt bar.
Aldaǵy jylytý maýsymynda kommýnaldyq-turmystyq sektor men halyqqa jalpy 7,5 mln tonna kómir qajet bolady. Onyń 1,6 mln tonnasy kommýnaldyq-turmystyq sektorǵa, 5,7 mln tonnasy halyqqa arnalǵan. Qajetti kólemder bekitilgen jospar-kestege sáıkes jetkizilmek.
Kómirdiń ýaqytyly jetkizilýin qamtamasyz etý úshin onyń óndirýshiden óńirlerge deıingi qozǵalysy turaqty baqylaýda. Osy baǵytta barlyq múddeli taraptardyń qatysýymen Respýblıkalyq shtab jumysyn jalǵastyryp jatyr.
Aıta keteıik, Óskemen JEO-da jańa energobloktyń qurylysy bastaldy.
