Qazaqstanda jylqy etiniń baǵasy qansha
ASTANA. KAZINFORM — Kazinform agenttigiń tilshisi jylqy eti baǵasynyń qaı óńirde arzan ekenin bildi.
Elimizde jylqy eti jaı ǵana et emes. Bul urpaqtan urpaqqa jalǵasqan tarıh, dástúr jáne mádenıet. Toı, otbasylyq basqosý jáne asa qadirli qonaqtardyń aldyna mol dastarhan jaıyp, jylqy etin usynady.
Dıetologtardyń aıtýynsha, jylqy etiniń adam aǵzasyna paıdasy mol ári dıetalyq et qataryna kiredi. Aqýyzǵa, temirge baı jáne quramynda V tobynyń dárýmenderi bar. Aǵzaǵa tez sińedi, sıyr men qoı etine qaraǵanda quramynda maı, holesterın az.
Mamandardyń aıtýynsha, dıeata ustaıtyn adamdarǵa, óz densaýlyǵyn kútetin jandarǵa jylqy eti paıdaly. Sondyqtan balalarǵa, eresek adamdar, aýyryp, em alyp júrgenderge jylqy etin jeý usynylady.
Jylqy etiniń taǵy bir artyqshylyǵy — baǵasy. Qazaqstannyń kóp óńirinde sıyr etine qaraǵanda jylqy etiniń baǵasy tómen. Sondyqtan jylqy eti ózgege qaraǵanda kópshilik úshin qoljetimdi. Qalalarda jylqy etiniń kelisi 2 500-7 000 teńge aralyǵynda.
Jylqy etin jilikten satyp alsa arzanǵa túsedi. Al jaıa, kesek et qymbat. Sonymen birge ystalǵan et baǵasy joǵary. Soǵym baǵasy arzan. Óıtkeni adamdar soǵymdy bútindeı nemese bólshektep satyp alady.
Elimiz boıynsha jylqy etiniń baǵasy Qostanaı qalasynda arzan. Kelisi 2 500 teńgeden bastalady. Alaıda mundaı arzan etti tek sharýalardan satyp alýǵa bolady. Al sýpermarketter men arnaıy et dúkenderinde baǵa 3 400 teńgeden bastalady.
Aqtaý qalasynda ettiń kelisi 2 700 teńge, Qyzylorda men Pavlodarda 2 900 teńgeden bastalady. Keıingi eki qalada mundaı tómen baǵany tek aýyl sharýashylyǵy jármeńkesinen taba alasyz. Al dúken men sýpermarkette baǵa 3 300 — 3 800 teńge.
Jylqy etiniń baǵasy Oral (3 000 tg), Aqtóbe (3 200 tg), Túrkistan (3 300 tg) jáne Petropavl (3 400 tg) qalalarynda sál joǵary. Al soǵymnyń kelisin 2 700 — 2 800 teńgege satyp alýǵa bolady.
Qazaqstandaǵy jylqy etiniń ortasha baǵasy — 3 500- 3 600 teńge. Mundaı baǵadaǵy etti Óskemen, Qaraǵandy, Jezqazǵan, Shymkent pen Astana qalalarynan satyp alýǵa bolady. Bul óńirlerde maısyz jaıanyń kelisin 7 500 teńgege satady. Al Kókshetaý men Taldyqorǵanda jylqy etiniń baǵasy 3 800 teńge jáne odan joǵary.
Al Tarazda jylqy etiniń kelisi 4 300 — 4 700 teńgege satylady. Dúkenderdegi ortasha baǵa — 4 500 teńge. Ózge óńirlermen salystyrǵanda bul qymbat. Al Almaty qalasynda jylqy etiniń baǵasy óte joǵary. Munda kelisi — 7 000 teńge.
Aıta keteıik, buǵan deıin Qazaqstanda qazy baǵasy qansha ekenin bildik.