Qazaqstanda jylyjaı bıznesin bastaý nege tıimdi – florıst keńesi

ASTANA. KAZINFORM – Qazaqstanǵa jylyna 200 mıllıon danadan astam gúl ımporttalǵanymen, ishki naryqta otandyq ónimge degen suranys áli de joǵary. Florıstıka salasyn tabysty kásipke aınaldyrǵan kópbalaly ana Altyn Mýsına «Jibek Joly» telearnasynyń «Búgin.LIVE» baǵdarlamasynda jylyjaı bıznesi týraly tarqatyp aıtty. 

Altyn Mýsına florıstıka salasynda 2019 jyldan beri eńbek etip keledi. Ýkraınada arnaıy bilim alǵan ol, búginde Nıderlandtyq kompanııanyń ambassadory retinde Qazaqstan naryǵyna hrızantemanyń jańa túrlerin tanystyrýmen aınalysady. Kásipkerdiń aıtýynsha, bul bıznes ádemi bolǵanymen, logıstıkalyq turǵydan óte kúrdeli.

– Gúl kásibindegi eń úlken másele – taýardy ýaqytynda aman-esen jetkizý. Buryn gúlder Amsterdamnan Qaraǵandyǵa ushyp kelip, keıin kólikpen Astanaǵa jetetin. Jolda turyp qalý, kedendik rásimdeý ýaqyt alatyn. Biz bul máseleni sheshý úshin gollandııalyq baǵbandarmen tikeleı baılanys ornatyp, gúlderdi Astanaǵa tikeleı ushaqpen aldyrý múmkindigine ıe boldyq. Sonyń arqasynda gúlderimiz sapaly ári ár jeti saıyn jańa kúıinde kelip turady, - deıdi Altyn Mýsına.

Kásipkerdiń pikirinshe, búginde tek gúl satý jetkiliksiz, qyzmet sapasy pen estetıka birinshi orynǵa shyqqan. Ol elimizde alǵashqylardyń biri bolyp gúldi arnaıy sýy bar akvabokstarmen satýdy engizgen. Bul satyp alýshynyń «gúldi qaıda qoıamyn?» degen ýaıymyn seıiltip, qyzmet kórsetý sapasyn jańa deńgeıge kótergen. 

– Qazir Qazaqstannyń iri qalalarynda jylyjaılar ashyla bastaǵany qýantady. Olar tek qyzǵaldaq emes, ranýnkýlıýs, eýstoma jáne raýshan ósirýdi qolǵa alyp jatyr. Alaıda otandyq ónim áli de naryqtaǵy úlken suranysty óteı almaı jatyr. Eger bireý daıyn bıznes bastaǵysy kelse, men osy jylyjaı sharýashylyǵyna qarajat quıýdy keńes berer edim. Tehnologııa men mamandar bolsa, bul – aqsha aınalymy óte tez júretin tabysty sala, - dep atap ótti kásipker. 

Statıstıka kórsetkendeı, qazaqstandyqtar gúldi tek merekede ǵana emes, kúndelikti ómirde de jıi syılaıtyn jomart halyqqa aınalǵan. Alaıda salada kásipti júıeli júrgizetin mamandar tapshy. Gúl bıznesiniń bolashaǵy – otandyq óndiristi damytý men halyqaralyq logıstıkany ońtaılandyrýda jatyr. 

Aıta keteıik, 8 naýryz merekesi qarsańynda suranysqa ıe gúlderdiń baǵasyn salystyryp kórgen bolatynbyz.