Qazaqstanda jylyna 25 myńǵa jýyq náreste shala týady
Jyl saıyn álemde 15 mıllıon sábı, al Qazaqstanda 25 myńǵa jýyq náreste shala týady. Mundaı statıstıkany Almatydaǵy Pedıatrııa jáne balalar hırýrgııasy ǵylymı ortalyǵynda ótken jıynda dárigerler málim etti, dep habarlady Kazinform.
17 qarasha - Halyqaralyq shala týǵan náresteler kúni. Qazaqstanda bul kún 2013 jyldan beri atap ótip keledi. Maqsat – shala týǵan náresteler máselelerine qoǵamnyń nazaryn aýdarý, ata-analarǵa qoldaý kórsetý, erte bosanyp qalýdyń qaýiptiligi men saldary, sondaı-aq aldyn alý jáne júktiliktiń tolyq merzimin saqtaý qajettiligi týraly aqparattandyrý.
Pedıatrııa ortalyǵynyń Neonatologııa jáne jańa týǵan nárestelerdiń hırýrgııa bóliminiń meńgerýshisi Aıjan Baıǵuttıevanyń aıtýynsha, álemde jylyna 15 mln náreste merziminen buryn dúnıege keledi. Al, bizdiń elde jyl saıyn 25 myńǵa jýyq sábı shala týady.
«Jyl saıyn bólimde ártúrli patologııamen respýblıkanyń ár óńirinen 400-ge jýyq náreste emdeledi. Olardyń 80 paıyzynyń salmaǵy 700 – 2500 grammǵa deıin. Júktiliktiń 25-35 aptalyǵyna týǵan sábıler. Medıtsına mamandary 2022 jyly túrli patologııamen dúnıege kelgen 300-den asa sábıdi ajal aýzynan aman alyp qalsa, bıyl jyl basynan beri 350-ge jýyq shaqalaqty kútip baptady. Bólim 20 tósek orynǵa arnalǵan. Dene salmaǵy 1000 gramm ǵana bolatyn shala týǵan nárestelerdiń ómir súrý deńgeıi aıtarlyqtaı ósti. Shala týǵan nárestelerdiń ólim-jitimi 3-4 esege tómendedi», - dedi Pedıatrııa ortalyǵynyń Neonatologııa jáne jańa týǵan nárestelerdiń hırýrgııa bóliminiń meńgerýshisi Aıjan Baıǵuttıeva.
Aıtýynsha, bólimde neonatologtar, neonataldy hırýrgter jáne oftalmo-hırýrgtar jumys isteıdi.
«Barshaǵa aıan, shaqalardardy kútip-baǵý úlken kúsh pen qaıratty, tózimdilik pen shydamdylyqty talap etedi. Bul tarapta erekshe uqypty kútim, joǵary tehnologııalyq quraldardy qoldana otyryp sapaly emdeý, uzaq baqylaýdy talap etetin neonatolog dárigerleriniń, neonataldy hırýrgtar men meıirbıkelerdiń eńbegi eren. Mamandar ata-ananyń psıhologııalyq daıyndyǵy da shala týǵan náresteni sátti kútýde úlken ról atqarady», - deıdi ol.
