Qazaqstanda jylyna 10 myń tonna qýattylyqtaǵy taǵamdyq jelatın óndirý zaýyty salynady
ASTANA. KAZINFORM – Mal sharýashylyǵy ónimderin tereń óńdeý salasyndaǵy ınvestıtsııalyq jobany iske asyrý máseleleri Aýyl sharýashylyǵy vıtse-mınıstri Ermek Kenjehanulynyń «KAZGELATIN» JShS ókilderimen kezdesýi barysynda talqylandy. Bul týraly Aýyl sharýashylyǵy mınıstrliginiń baspasóz qyzmeti habarlady.
Joba Almaty oblysynda taǵamdyq jelatın óndiretin jáne mal sharýashylyǵynyń janama ónimderin – teri, súıek jáne basqa da kollagen quramdy shıkizatty tereń óńdeıtin zaýyt salýdy kózdeıdi.
Kásiporynnyń jobalyq qýattylyǵy jylyna shamamen 10 myń tonna taǵamdyq jelatındi quraıdy. Negizgi ónimnen bólek, kollagen komponentterin, jemdik aqýyzdar men tehnıkalyq maılardy óndirý josparlanyp otyr. Investıtsııalardyń jalpy kólemi 58 mlrd teńge kóleminde baǵalanady.
Qazirgi ýaqytta ishki naryqtaǵy taǵamdyq jelatınge degen suranys tolyqtaı ımport esebinen qamtamasyz etiledi, bul rette elimizde jetkilikti shıkizat bazasy bar. Qazaqstanda mal sharýashylyǵynyń janama ónimderiniń aıtarlyqtaı kólemi qalyptasady, olardy tıimdi óńdeý joǵary qosylǵan quny bar ónim óndirýge múmkindik beredi. Otandyq óndiristi iske qosý ımportqa táýeldilikti tómendetýge, aýyl sharýashylyǵy shıkizatyn óńdeý deńgeıin arttyrýǵa jáne azyq-túlik qaýipsizdigin nyǵaıtýǵa yqpal etedi.
Ermek Kenjehanuly joba agroónerkásiptik keshendi damytýdyń strategııalyq basymdyqtaryna sáıkes keletinin jáne eksportqa baǵdarlanǵan óndiristi, onyń ishinde Halal ónimderin qalyptastyrýǵa baǵyttalǵanyn atap ótti. Sondaı-aq Mınıstrlik qoldanystaǵy memlekettik qoldaý quraldary aıasynda jan-jaqty qoldaý kórsetetinin jetkizdi.
Óńirlerde aýyl sharýashylyǵy janýarlarynyń terisi men súıekterin qabyldaý úshin daıyndaý uıymdarynyń jelisin qurý máselesine de erekshe nazar aýdaryldy.
Osyǵan deıin ShQO-da maıly jáne jarmalyq daqyldar tuqymyn óńdeý zaýyty iske qosylatynyn habarlaǵanbyz.