Qazaqstanda jyl sońyna deıin Stadler poıyzdary qatynaı bastaıdy
ASTANA. KAZINFORM – «Stadler Qazaqstan» kompanııasynyń kommertsııalyq dırektory Sergeı Leontev jańa jolaýshylar vagonynyń erekshelikteri týraly aıtyp berdi. Bul vagondardy jyl sońyna deıin shyǵarý josparlanyp otyr, dep habarlaıdy Kazinform tilshisi.
Onyń sózinshe, kompanııa Qazaqstanǵa ınvestıtsııa salýdy 2022 jyly satyp alynǵan zaýytty jańǵyrtý jobasynan bastaǵan.
– Eń aldymen, bizge zaýytty shveıtsarııalyq óndirýshiniń tehnologııasyna saı qaıta qurý qajet boldy. Qazirgi ýaqytta jolaýshylar vagondaryn óndiretin tolyq tsıkl iske qosyldy, alǵashqy vagondar synaqtan ótip jatyr, jyl sońynda olar relske shyǵady. Jyl sońyna deıin shamamen úsh poıyz jetkiziledi dep kútip otyrmyz. Vagondar sanyn operatordyń ózi anyqtaıdy, - dedi Sergeı Leontev KGIR-2025 jahandyq ınvestıtsııalar boıynsha dóńgelek ústel kýlýarynda.
Spıker jańa vagondardyń tek Qazaqstan úshin ǵana emes, álemdik deńgeıde de biregeı bolatynyn atap ótti.
– Sebebi bul eń úlken kólemdegi vagondar, sáıkesinshe eń keń kýpeler men bagajǵa arnalǵan oryndary bolady. Tipti Qazaqstanǵa arnalǵan óte erekshe temperatýralyq rejım bar. Stadler kompanııasy vagondaryn -50 gradýs temperatýrasy bar Norvegııaǵa, +45 gradýs ystyq Aljırge de jetkizgen. Al Qazaqstanda biz osy eki rejımdi biriktirdik: -50-ten +45 gradýsqa deıin. Bizdiń vagondarymyz eldiń kez kelgen núktesinde 48 saǵat boıy qosymsha jumys isteı alady, - dedi Sergeı Leontev.
Jańa poıyzdar Astana – Almaty, Astana – Shymkent, Astana – Semeı jáne Astana – Atyraý baǵyttarynda júredi.
Eske sala keteıik, buǵan deıin «Astana – Arqalyq» baǵytynda júretin poıyzda Starlink spýtnıktik ınterneti qosylǵanyn jazǵanbyz.