Qazaqstanda jyl saıyn jasandy ıntellekt salasynda 1 myń maman daıarlanady
ASTANA. KAZINFORM – Qazaqstanda jasandy ıntellekt ortalyǵy qurylady. Bul týraly Parlament Májilisinde jasandy ıntellektti qoldaný máselelerin talqylaý kezinde QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń birinshi vıtse-mınıstri Qanysh Tóleýshın aıtty.
«Qazir jasandy ıntellekt ortalyǵyn qurý jumystaryna kiristik. Bul ortalyq álemdegi aldyńǵy qatarly tájirıbeni paıdalanýda tıisti platforma qyzmetin atqarady. Osy jumystar Astana Hub-pen birge iske asyrylady. Bul jumystar aıasynda saladaǵy talanttardy daıarlaýǵa jáne adamı kapıtaldy damytýǵa erekshe ekpin qoıylmaq», - dedi Q. Tóleýshın.
Onyń aıtýynsha, jyl saıyn 1000 jasandy ıntellekt mamanyn daıyndaý maqsat etilip otyr.
«Biz jasandy ıntellekt salasynda jyl saıyn 100 startapty iske qosa otyryp, jylda 1000 jasandy ıntellekt mamanyn daıyndaýdy maqsat etip qoıdyq. Sonymen qatar, 2026 jylǵa qaraı jyl saıyn osy salada 1 mıllıard dollar eksporttyq kiriske qol jetkizý mindetin belgiledik», - dedi vıtse-mınıstr.
