Qazaqstanda jyl saıyn 90 myńnan astam júrekke operatsııa jasalady
ASTANA. KAZINFORM – Qazaqstanda kardıohırýrgııa salasy qarqyndy damyp, búginde jyl saıyn 90 myńnan astam júrekke operatsııa jasalady. Bul týraly QR DSM Qoǵamdyq densaýlyq saqtaý ulttyq ortalyǵynyń basqarma tóraǵasy Erık Baıjúnisov Ortalyq kommýnıkatsııalar qyzmetinde ótken brıfıngte málim etti.
Onyń aıtýynsha, mundaı ósim densaýlyq saqtaý júıesindegi júıeli reformalar men joǵary tehnologııalyq medıtsınanyń damýynyń nátıjesi.
– 2005 jyly elimizde jylyna nebári 80–90 júrek operatsııasy jasalatyn. Qazir bul kórsetkish 90 myńnan asty. Bul – salanyń sapalyq jańa deńgeıge kóterilgeniniń aıqyn kórinisi, – dedi ol.
Sonymen qatar qan aınalymy júıesi aýrýlarynan bolatyn ólim-jitim aıtarlyqtaı tómendegen. Eger 2005 jyly qaıtys bolǵandardyń 51,5%-y ınfarkt pen ınsýlt saldarynan kóz jumsa, búginde bul kórsetkish 22,5%-ǵa deıin azaıǵan.
Saladaǵy mańyzdy jetistikterdiń biri – Ulttyq ǵylymı onkologııalyq ortalyqtyń ashylýy. Bul onkologııalyq kómektiń sapasyn arttyryp, zamanaýı emdeý tásilderin engizýge múmkindik berdi.
– Sońǵy 20 jylda qalyptasqan densaýlyq saqtaý modeli búginde halyqaralyq talaptar men sapa standarttaryna tolyq sáıkes keledi, – dedi spıker.
Aıta keteıik, Úkimettiń sheshimimen Qazaqstanda densaýlyq saqtaýdy damytýdyń tujyrymdamasy 2029 jylǵa deıin uzartyldy. Qujatta qoǵamdyq densaýlyqty nyǵaıtý, aýrýlardyń aldyn alý jáne halyqtyń ómir saltyn jaqsartý negizgi basymdyq retinde aıqyndalǵan.
