Qazaqstanda jyl saıyn 1,5 mln endoskopııalyq zertteý júrgiziledi
ASTANA. KAZINFORM – Elordada endoskopııa, onkologııa, hırýrgııa jáne gastroenterologııa salasynyń jetekshi mamandarynyń qatysýymen Qazaqstandyq endoskopııalyq qoǵamnyń jıyny ótip jatyr.
Basqosýda asqazan-ishek joly aýrýlaryn dıagnostıkalaý men emdeýdegi endoskopııanyń zamanaýı múmkindikteri, saraptamalyq vızýaldy dıagnostıka jáne az ınvazııalyq emdeý ádisterin damytý máseleleri talqylanýda.
Mamandardyń málimetinshe, búginde Qazaqstanda 400-ge jýyq endoskopıst dáriger jumys isteıdi. Elimizde jyl saıyn shamamen 1,5 mıllıon endoskopııalyq zertteý men aralasý júrgiziledi.
Sarapshylardyń aıtýynsha, bul baǵyttyń damýy obyr aldy ózgerister men onkologııalyq aýrýlardy erte kezeńde anyqtaýǵa, sondaı-aq aǵzany saqtaıtyn jáne az ınvazııalyq emdeý tehnologııalaryn keńinen qoldanýǵa múmkindik berip otyr.
– Endoskoptardyń zamanaýı býyny shyryshty qabyqty, tamyrlyq jáne betki qurylymdy naqty ýaqyt rejıminde egjeı-tegjeıli baǵalaýǵa múmkindik beredi. Búginde arnaıy spektrli, zoom jáne 3D-endoskopııa qarqyndy damyp keledi. Dıagnostıkanyń sapasyn edáýir jaqsartatyn jáne obyrdy eń erte satysynda anyqtaýǵa kómektesetin jańa vızýalızatsııa rejımderi paıda bolýda, – dedi QR Densaýlyq saqtaý mınıstrligi Ulttyq ǵylymı onkologııa ortalyǵynyń saraptamalyq endoskopııa bólimshesiniń meńgerýshisi Qanat Batyrbekov.
Onyń aıtýynsha, buryn ashyq hırýrgııalyq operatsııalardy qajet etken kóptegen aralasýlar búginde endoskopııalyq ádispen júzege asyrylady.
– Qazirgi tańda kóptegen operatsııalar tiliksiz, jaraqattylyǵy tómen tásilmen jasalady. Bul naýqastyń aýrýhanada jatý merzimin qysqartyp, tezirek qalpyna kelýine múmkindik beredi, – dedi maman.
Forým aıasynda tájirıbe almasýǵa erekshe nazar aýdarylýda. Іs-sharanyń ekinshi kúni óńesh, asqazan jáne ishek aýrýlaryna jasalatyn joǵary tehnologııalyq endoskopııalyq operatsııalardyń tikeleı efırdegi kórsetilimi uıymdastyrylady.
Sonymen qatar jıyn barysynda zamanaýı endoskopııalyq jabdyqtar men dıagnostıka jáne emdeýge arnalǵan ınnovatsııalyq sheshimderdiń kórmesi usynyldy.
Mamandardyń pikirinshe, jańa tehnologııalar az ınvazııalyq medıtsınany damytýǵa jáne onkologııalyq ári gastroenterologııalyq aýrýlarmen kúreste otandyq densaýlyq saqtaý júıesiniń múmkindikterin keńeıtýge jol ashady.
Aıta keteıik, Qazaqstanda ókpeniń sırek aýrýyna shaldyqqan patsıentke alǵash ret kúrdeli ota jasaldy.
