Qazaqstanda jyl saıyn 1 800-ge jýyq áıelge jatyr moıny obyry dıagnozy qoıylady
ASTANA. KAZINFORM – Qazaqstanda jyl saıyn shamamen 1 800 áıelge jatyr moıny obyry dıagnozy qoıylady. Ókinishke qaraı, jylyna 600-ge jýyq adam osy aýrýdyń saldarynan qaıtys bolady.
Densaýlyq saqtaý mınıstrligi málimetinshe, áıelder arasyndaǵy onkologııalyq aýrýlar qurylymynda jatyr moıny obyry sút bezi obyrynan keıin ekinshi orynda tur. Aýrýdyń damý qaýpi, ásirese 40 jastan keıin arta túsedi.
Mınıstrlik habarlaýynsha, Qazaqstanda jatyr moıny obyryn erte anyqtaýǵa baǵyttalǵan ulttyq skrınıngtik baǵdarlama iske asyrylyp keledi. Baǵdarlama isik aldy jaǵdaılardy jáne aýrýdyń bastapqy kezeńderin anyqtaýǵa múmkindik beredi. Erte kezeńde anyqtalǵan jaǵdaıda bul dert tolyq emdelýi múmkin.
Vedomstvo klınıkalyq tájirıbeden mysal keltirdi. 50 jastaǵy áıelde jatyr moınynyń preınvazıvti obyry josparly profılaktıkalyq tekserý barysynda anyqtalǵan. Patsıentke Ulttyq ǵylymı onkologııa ortalyǵynda laparoskopııalyq ádispen radıkaldy hırýrgııalyq em júrgizilgen. Operatsııa barysynda jatyr moınymen birge jatyr, analyq bezder jáne jatyr tútikteri alynǵan.
Operatsııa III dárejeli semizdikke baılanysty tehnıkalyq turǵydan kúrdeli bolǵanymen, az ınvazıvti laparoskopııalyq ádis asqyný qaýpin tómendetip, qalpyna kelý kezeńin aıtarlyqtaı qysqartýǵa múmkindik bergen. Dárigerlerdiń boljamy qolaıly, patsıentti operatsııadan keıin 3-4 táýlik ishinde shyǵarý josparlanǵan.
Mınıstrlik málimetinshe, jatyr moıny obyry erte anyqtalyp, ýaqtyly hırýrgııalyq em júrgizilgen jaǵdaıda tolyq jazylady. Sonymen qatar bul aýrýdyń aldyn alýǵa bolatyny da atap ótildi. ıAǵnı, adam papıllomasy vırýsyna qarsy vaktsınatsııa jatyr moıny obyrynyń aldyn alýdyń tıimdi tásilderiniń biri sanalady. Bul shara Dúnıejúzilik densaýlyq saqtaý uıymynyń jatyr moıny obyryn joıý jónindegi jahandyq strategııasy aıasynda júzege asyrylyp keledi. Qazirgi tańda mundaı tájirıbe álemniń 148 elinde qoldanylady.
Qazaqstanda qyz balalardy adam papıllomasy vırýsyna qarsy ımmýndaý 2024 jyldan bastap Profılaktıkalyq egýlerdiń ulttyq kúntizbesine sáıkes júrgizilip jatyr.
Aıta keteıik, elde ınsýlt pen obyrdy erte anyqtaýǵa arnalǵan JI-servıster keńeıtiledi.