Qazaqstanda jyl basynan beri turǵyn úılerde 4,8 myńnan astam órt shyqqan
ASTANA. KAZINFORM – Qazaqstanda 2026 jyldyń basynan beri turǵyn úı sektorynda 4 876 órt tirkeldi. Tótenshe jaǵdaılar mınıstrligi as úıde órt shyqqan jaǵdaıda alǵashqy mınýttarda qandaı áreket jasaý kerektigin túsindirdi.
Vedomstvo málimetinshe, turǵyn úılerdegi órt sany ótken jyldyń sáıkes kezeńimen salystyrǵanda 12,5%-ǵa azaıǵan.
Órtterdiń 50,6%-y elektr jabdyqtaryn montajdaý jáne paıdalaný qaǵıdalaryn buzýdan, 18,4%-y peshpen jylytý kezinde qaýipsizdik talaptaryn saqtamaýdan, al 16%-y otpen abaısyz jumys isteýden shyqqan.
Mınıstrlik mamandary as úıdegi órt sanaýly sekýndta tutanyp, tez taralýy múmkin ekenin eskertedi. Buǵan qaraýsyz qalǵan plıta, shamadan tys qyzǵan maı nemese aqaýy bar elektr qurylǵysy sebep bolýy yqtımal.
– Maı tutanǵan jaǵdaıda eń basty ereje – sý quımańyz. Sý lezde býǵa aınalyp, janyp jatqan maıdyń shashyraýyna jáne órttiń taralýyna ákelýi múmkin, – dep eskertti mınıstrlik.
Mamandardyń túsindirýinshe, mundaı jaǵdaıda qaýipsiz bolsa, plıtany óshirip, ydystyń betin qaqpaqpen jabý qajet. Bul otteginiń kelýin toqtatyp, jalyndy basýǵa kómektesedi.
Janyp jatqan tabany nemese kastróldi qozǵaýǵa bolmaıdy. Ydys tolyq sýyǵansha qaqpaǵyn ashpaý kerek. Eger jalyn tarala bastasa, dereý bólmeden shyǵyp, 101 nemese 112 nómirine habarlasqan jón.
Al elektr qurylǵysy tutansa, qaýipsiz bolǵan jaǵdaıda ony aldymen elektr jelisinen ajyratý qajet. Toqqa qosylyp turǵan jabdyqty sýmen sóndirýge tyıym salynady.
Eger tútin paıda bolyp, órt kúsheıse, ony ózdiginen sóndirýge tyryspaı, bólmeniń esigin jaýyp, syrtqa shyǵý kerek. Sondaı-aq kórshilerdi eskertip, lıftini paıdalanbaǵan jón.
TJM órttiń aldyn alý úshin tamaq daıyndaý kezinde plıtany qaraýsyz qaldyrmaýǵa, tez tutanatyn zattardy ottan alys ustaýǵa jáne elektr symdary men turmystyq tehnıkanyń jaı-kúıin turaqty tekserýge keńes beredi.
Balalardyń plıta men ystyq ydystarǵa jaqyndamaýyn qadaǵalaý da mańyzdy.
Mınıstrlik órt shyqqan jaǵdaıda múlikti qutqarýǵa ýaqyt joǵaltpaı, eń aldymen adamdardyń qaýipsizdigin qamtamasyz etý qajettigin atap ótti.
Aıta keteıik, buǵan deıin Tótenshe jaǵdaılar mınıstrligi turǵyn úılerdegi órttiń shamamen 40 paıyzy elektr jabdyqtaryn ornatý jáne paıdalaný erejelerin buzýdan shyǵatynyn málimdegen edi.
