Qazaqstanda jyl basynan beri tynyshtyqty buzýdyń 79 myń deregi tirkeldi
ASTANA. KAZINFORM – Qazaqstanda jyl basynan beri polıtsııa tynyshtyqty buzýdyń 79 myń faktisiniń jolyn kesti. Bul ótken jyldyń sáıkes kezeńimen salystyrǵanda 13%-ǵa kóp, dep habarlaıdy Polisia.kz.
Іshki ister mınıstrligi «Zań men Tártip» qaǵıdaty aıasynda kez kelgen quqyq buzýshylyqqa der kezinde den qoıý jáne jaýapkershilikti qamtamasyz etý baǵytyndaǵy jumysty jalǵastyryp keledi.
Atap aıtqanda, túngi ýaqytta tynyshtyqty buzý, buzaqylyq jasaý, aýlalar men basqa da qoǵamdyq oryndarda pırotehnıkalyq quraldardy paıdalaný faktileri baqylaýǵa alynǵan.
Kópqabatty turǵyn úıler ornalasqan aýmaqtarda, aýlalarda, kafe, meıramhana jáne oıyn-saýyq oryndarynyń mańynda patrýldeý kúsheıtildi. Quqyq buzýshylyqtardy anyqtaýǵa beınebaqylaý kameralary da jumyldyrylǵan. Jappaı beınebaqylaý aıasynda kameralar jedel basqarý ortalyqtaryna qosylyp jatyr. «Qaýipsiz úı» jobasy boıynsha ýchaskelik ınspektorlar aýladaǵy beınekameralarǵa qol jetkizýde.
Jyl basynan beri Ákimshilik quqyq buzýshylyq týraly kodekstiń 437-baby boıynsha tynyshtyqty buzýdyń 79 myń faktisiniń joly kesilgen. Al eldi mekenderde pırotehnıkalyq quraldardy paıdalanǵany úshin 269 quqyq buzýshylyq anyqtaldy. Bul ótken jylmen salystyrǵanda úsh ese kóp.
– ІІM-niń ustanymy aıqyn: qoǵamdyq tártipti buzýdyń birde-bir faktisi nazardan tys qalmaýy tıis. Zań barshaǵa ortaq, al tártip aınaladaǵy adamdardyń quqyqtaryn qurmetteýden bastalady, – delingen habarlamada.
Eger tynyshtyqty buzý buzaqylyq árekettermen qatar júrse, kináli tulǵalar ÁQBtK-niń 434-baby boıynsha usaq buzaqylyq jasaǵany úshin jaýapkershilikke tartylady.
Sonymen qatar kásipkerlermen de jeke jumys júrgizilip jatyr. Tynyshtyqty buzý faktilerine baılanysty ýchaskelik ınspektorlar mundaı quqyq buzýshylyqtarǵa yqpal etetin sebepter men jaǵdaılardy joıý úshin kásipkerlik sýbektileriniń atyna 8 myńnan astam usyný engizgen.
Aldyn alý jumystaryna da basymdyq berilgen. 6 myńnan astam ýchaskelik ınspektor shaǵyn aýdandar men turǵyn úı keshenderi turǵyndarynyń chattaryna qosylǵan. Bul azamattardyń ótinishterin jedel qaraýǵa, quqyq buzýshylyqtarǵa der kezinde den qoıýǵa jáne zań talaptaryn túsindirýge múmkindik beredi.
Aıta keteıik, Jetisýda tynyshtyqty buzǵan turǵyndar 40 mıllıon teńgeden astam aıyppul tóledi.
