Qazaqstanda jyl basynan beri 884 zańsyz qoqys polıgony anyqtaldy
ASTANA. KAZINFORM – Qazaqstanda bıyl spýtnıktik monıtorıng nátıjesinde 884 zańsyz qoqys polıgony anyqtaldy. Onyń 196-sy nemese 22 paıyzy joıylǵan. Bul týraly Ortalyq kommýnıkatsııalar qyzmetinde ótken brıfıngide Ekologııalyq retteý jáne baqylaý komıtetiniń tóraǵasy Erbolat Qojyqov málim etti.
Onyń aıtýynsha, zańsyz qoqys úıindilerin anyqtaý jáne joıý jumystary 2018 jyldan beri Ekologııa jáne tabıǵı resýrstar mınıstrligi men «Qazaqstan Ǵarysh Sapary» ulttyq kompanııasynyń birlesken spýtnıktik monıtorıngi arqyly júrgizilip keledi.
– Bıylǵy monıtorıng barysynda elimiz boıynsha 884 zańsyz qoqys polıgony anyqtalǵan. Qazirgi ýaqytta olardyń 196-sy joıyldy. Eń kóp zańsyz qoqys polıgony Abaı oblysynda tirkelgen. Óńirde 137 nysan anyqtalsa, Qostanaı oblysynda olardyń sany 113-ke, Ulytaý oblysynda 100-ge jetken, – dedi Erbolat Qojyqov.
Komıtet tóraǵasynyń málimetinshe, monıtorıng jumystary Astana, Almaty jáne Shymkent qalalarynda, sondaı-aq Aqtóbe, Shyǵys Qazaqstan jáne Soltústik Qazaqstan oblystarynda áli de jalǵasyp jatyr.
Sonymen qatar sońǵy jyldary zańsyz qoqys polıgondarynyń sany birtindep azaıyp keledi. Máselen 2020 jyly el boıynsha 8 884 zańsyz qoqys orny anyqtalsa, 2025 jyly bul kórsetkish 3 828-ge deıin tómendegen.
Alaıda keıbir óńirlerde qoqys úıindilerin joıý jumystary áli de jetkiliksiz. Osyǵan baılanysty bıyl jergilikti atqarýshy organdardyń 15 laýazymdy tulǵasy ákimshilik jaýapkershilikke tartylyp, olarǵa jalpy somasy 3,7 mln teńge aıyppul salynǵan.
Eske sala keteıik, elordada kóshege qoqys tastaǵan azamattar 446 mıllıon teńge aıyppul tólegen.
