Qazaqstanda jyl basynan beri 4 tonnadan astam esirtki tárkilendi
ASTANA. KAZINFORM – Halyqaralyq nashaqorlyqqa jáne esirtkiniń zańsyz aınalymyna qarsy kúres kúnine oraı Іshki ister mınıstrligi elimizde osy baǵytta atqarylyp jatqan jumystardyń qorytyndysyn usyndy.
ІІM baspasóz hatshysy Shuǵyla Turlybektiń málimdeýinshe, 2025 jyldyń alǵashqy bes aıynda Qazaqstanda esirtkige qatysty 1 445 qylmys tirkelip, olardyń 991-i satý faktisi retinde anyqtalǵan. Sonymen qatar asa iri mólsherde saqtaý boıynsha 165 derek tirkelgen.
Zańsyz aınalymnan 4 tonnadan astam ártúrli esirtki zattary tárkilendi, onyń ishinde 476 kg sıntetıkalyq esirtki bar. 18 uıymdasqan qylmystyq toptyń áreketine tosqaýyl qoıyldy.
– Internet jelisi arqyly esirtki qylmystaryn anyqtaý baǵytynda júıeli jumys júrgizilip jatyr. Jyl basynan beri Mádenıet jáne aqparat mınıstrligine 16 myńnan astam esirtki saıttaryn buǵattaý jóninde suranys jiberilgen. Degenmen búginde esirtki jarnamasy «jasyryn» sıpatqa kóship, habarlandyrý saıttary arqyly taralýda, - dedi Shuǵyla Turlybek.
Maýsym aıynda bastalǵan «Qarasora» jedel-aldyn alý is-sharasy da nátıjesin berip keledi. Bul operatsııa maýsymnyń 1-inen qazannyń 31-ine deıin júrgiziledi.
Bıyl «Qarasora» operatsııasy aıasynda 299 esirtki quqyqbuzýshylyǵy anyqtaldy, onyń ishinde 168-i qylmys. Zańsyz aınalymnan 1 tonna 788 kg esirtki, 6 tonna prekýrsor tárkilenip, 7 155 túp qarasora joıyldy. Barlyǵy 272 adam ustaldy.
– Túrkistan oblysynda tramadol preparatyn zańsyz satýmen aınalysqan bir uıymdasqan top quryqtaldy. Sondaı-aq tórt esirtki zerthanasy joıyldy, olardyń ekeýi sıntetıkalyq zattar óndirse, qalǵan ekeýi fıtozerthana bolǵan, - dedi ІІM baspasóz hatshysy.
Odan bólek, Abaı, Pavlodar jáne Jambyl oblystarynda úsh iri ishki esirtki arnasy joıyldy.
– Qarasora ósetin aımaqtardy baqylaý úshin ІІM Ulttyq ulanynyń tikushaqtary men Qorǵanys mınıstrliginiń ushqyshsyz apparattary qoldanylýda. Bul qurylǵylar shóldi, qoljetimsiz aımaqtarda esirtki ósimdikterin baqylaýǵa múmkindik berip otyr. Sondaı-aq ormanshylarmen, geologııalyq barlaý kompanııalarymen, sharýa jáne ańshylyq qojalyqtarymen tyǵyz áriptestik ornatylǵan, - dedi spıker brıfıng barysynda.
Bul is-sharalar Qazaqstanda esirtkiniń zańsyz aınalymyna qarsy kúrestiń júıeli ári keshendi túrde júrgizilip jatqanyn kórsetedi.
Eske sala keteıik, buǵan deıin keıingi bes jylda zańsyz aınalymnan alynǵan sıntetıkalyq esirtkiniń kólemi 100 ese ulǵaıǵanyn jazǵan edik.