Qazaqstanda jyl basynan beri 326,3 myń tonna nan shyǵaryldy

ASTANA. KAZINFORM – Álemde jyl saıyn 16 qazan — «Nan kúni» retinde atalyp ótedi. Qazaqstan – astyqqa baı, álemdik naryqta óz ornyn aıqyndaǵan, ishki naryqty tolyqtaı qamtamasyz etip otyrǵan, nandy erekshe qadirleıtin ári nan pisirýdiń baı dástúrin qalyptastyrǵan el.

Aýyl sharýashylyǵy mınıstrligi málimetinshe, ótken jyly elimizde 510,1 myń tonna nan óndirilse, osy jyldyń qańtar–tamyz aılarynda bul kórsetkish 326,3 myń tonna boldy.

Búginde nan zaýyttarynyń óndiristik qýaty jylyna 457,4 myń tonnaǵa jetedi. Ónimniń negizgi bóligi – bıdaı unynan pisirilgen qalypty nan. Onyń úlesi jalpy assortımenttiń shamamen 60%-y. Tutynýshylardyń suranysyna saı ónim túrleri jyl saıyn artyp keledi. Nannyń dástúrli túrlerinen bólek, uzaq jáne qysqa merzimge saqtalatyn toqashtar, unnan jáne kondıterlik ónimderdiń san túri shyǵarylady.

Aýyl sharýashylyǵy ónimderin qaıta óńdeıtin kásiporyndarǵa memleket tarapynan júıeli qoldaý kórsetiledi.

2021–2030 jyldarǵa arnalǵan AÓK damytý tujyrymdamasy aıasynda jylyna 2 myń tonnadan astam nan-toqash nemese kondıterlik ónim óndiretin kásiporyndarǵa ınvestıtsııalyq shyǵyndarynyń 25%-yn óteý túrinde qoldaý qarastyrylǵan. Budan bólek, un óndirýshiler úshin salyqtyq jeńildikter bar. Salyq kodeksiniń 411-babyna sáıkes, bul saladaǵy QQS mólsherlemesi 70%-ǵa tómendetilgen.

Qazirgi tańda Qazaqstandaǵy nan óndirisi ishki naryqtyń qajettiligin tolyq qamtamasyz etip otyr. Árbir nan ónimi – dıqannyń, dıirmenshiniń, naýbaıshynyń jáne logısttiń mańdaı teriniń jemisi. «Egis dalasynan – dúken sóresine deıin» úzdiksiz júretin bul óndiristik tizbek halqymyzdy kún saıyn sapaly ári qoljetimdi nanmen qamtamasyz etip keledi.

Aıta keteıik, Ózbekstanda qazaqstandyq bıdaı men maı ónimderine suranys artyp keledi.